Mipi Nih Theih Ve Dingah Aphu Ko AA Hriamtlai Hna Nih Cun Ralrin Pek Nak Ca Thanh An Chuh Uico Hna He Zeitik Poh Ah Kan I

Chin ramkulh, Paletwa peng Abawngtha khua kam ah May 26 ah AA le SAC ralkap kahdohnak a chuak, tiah AA nih a chim. May 26 zing sml 10:00 hrawng ah Abawngtha khua kam ummi AA cu, SAC ralkap pawl nih an kah hna, tiah AA chimnak nawlngeitu Khine Tu Kha nih Western News ah a chim.

May 26 zinglei sml 10:00 hrawng ah AA ralkap an umnak ah SAC ralkap nih an kalhnawh hna i an kah hna. Hriamngan in chun nitlak an kah hna. Kahdohnak he pehtlai in thawngfiang kan thei kho rih lo, tiah Khine Tu Kha nih a chim. Paletwa peng ah hlan piin thilri phurhnak caah Kyauktaw khua cu hman bikmi a si. Paletwa mi hna caah tlunkalnak le fimcawnnak a hnorsuan ngai, tiah Paletwa tualchung mi pakhat nih Western News ah a chim.

Nizan May 26 sml 9:00 in zanlei 2:00 tiang hrawng cu hriamngan thawng lawngte a thang ko. A hlanpi in Matupi-Paletwa lam cu phih a si cang, Kyuaktaw khua lawng hi thil phorhnak le umkalnak ah kan hman. Abawngtha khua kam kahdohnak a um caah lam an phih lai hi kan ṭih ngai ko. Sianginn kai zong a nai cang nain, Paletwa chaklei lawng hi kai khawh dawh an si. Khuate ahcun kai ngam zong a si lai lo, tiah a chimchap.

A luancia May 15 lio ah Paletwa peng Thadawng khua kam umhmun khuarmi SAC ralkap eidin chantu Helicopter cu AA nih an rak kah cang. Cu pinah Ann, Myuak U le Buthidawng peng ah SAC ralkap nih hriamngan in an rak kah, tiah Paletwa mi pakhat nih a chim.

Kawl ralkap nih Rakhine ram chung ka zakip ah thazaang an chap tuk, United League Of Arakan(ULA) nih biaceihnak, ngunkhuai kholhnak le ukhruainak a tuahmi cu hnahnawh an pek. Cu chung i rian a ṭuanmi hna zong tlaih ding in an tlerh hna, biaceihnak zung zong an kulh, SAC ralkap nih Rakhine-Muslim karlak ah rem lonak thiltuah an i tim. Cucaah SAC ralkap nih remdaih tonbiaruah sawmnak kai ding a si kholo, tiah AA chim phuannak nawlngeitu Khine Tu Khah nih a rak chim.

A luancia caan ah AA ralbawi zik Htun Myat Naing nih Tainghmu General Htin Lat Oo zong ralrin a rak pek cang. A luanci May 19 thawngpang fiangternak tuah lioah Rakhine ramchung ah kahdohnak a chuah ahcun SAC ralkap sual kan puh te hlah u, tiah SAC ralkap chimphuannak nawlngeitu Zaw Min Htun nih tlerhnak bia a rak chim.

Kannih Cu A Dikmi Lei Ah Kan Dir Tiah SNLD Chairman Sai Nyunt Lwin Nih A Chim. Shan Nationalities League For Democracy(SNLD) cu uknak lak hnu in SAC ralkap lei ṭan lo ding le a dikmi le a dik lomi thil pahnih cungah, a dikmi lei in dir ding ah biachahnak kan tuah cang, tiah SNLD Chairman Sai Nyunt Lwin nih mizapi sin ah theihternak a tuah.

May 26 Taungkyi khua SNLD tonbiaruahnak ah Myanmar ram kong he pehtlai in a chimmi a si. “Uknak lak hnu in buaibainak ah i tel lo ding ralring tein kan um i, a dikmi lei in kan dir. Tulio rampi buaibainak ah anak le a raang hi zeidah a si, tiah ṭha tein kan zohfial hnu ah a dikmi lei ṭan ding ah biachahnak kan tuah,” tiah a chim.

Buaibainak hi an sersiam khawh lo ahcun Myanmar ram cu zorchuk lei a panh lai i, Ne Win thok in mi pakhat uknak in rampi a rawk dih lai, tiah SNLD Chairman nih a chim.

Tulio rampi buainak sersiam khawh lo ahcun zorchuk lei a panh ciahmah ko lai. Mi pakhat uknak lawng in zeitik hmanh ah ram a ṭha ballo. Fiang tein chim ko ahcun 1962 thawk in nihin tiang mi pakhat uknak in kan kal, rampi a ṭhangcho maw ti ahcun a ṭhangcho hrimhrim lo. Cucaah hruaitu pakhat lawng nih ukmi ram a ṭhancho lo ning a fiang tuk, tiah a chim.

Anmah le anmah an thinlung an i remh khawh hlan ahcun rampi thlen timh cu a si kho lo tukmi a si. Cu ve bantukin SAC ralkap doh cuahmah lio le tuk cuahmah lio ah hramhram uknak lungthin kan ngeih ahcun uknak chuttu bantuk kan si ko hnga! tiah ralrin peknak zong a chim.

Hriamnam in ram hi ser a si, hriamnam ngeih lo ahcun hmai a hngal lo. Hriamnam hman a hauh ahcun kan hman ve a hau. Tulio ram buainak ruangah hriamnam lawngte tlaih a si tikah fiamcawnnak le ngandamnak kongkau ah harnak a tamnak kong cu, SNLD Chairman Sai Nyunt Lwin nih a chim.

Semilawh Khuakam SAC Ralkap Sakhan Thianhhlimh Nak An Tuah, Hriamnam Thilri Cheukhat An Lak. Shan – Karenni (Kaya) ramri, Phekhone peng chung Semilawh khua thlanglei ah um mi SAC ralkap sakhan cu May 26 ah a voi 2 nak thianhhliamh nak kan tuah i hriamnam le ralkap thilri kan lak khawh tiah KNDF B3 nih cathanh an chuah.

Cu SAC sakhan cu May 24 ah khan Karenni ralkap phu hna nih an kah hna i sakhan ah a um mi SAC ralkap hna cu hnu an tolh i bomb an hmanh tak caah mizapi vengtu ralkap hna nih an thianh i an hrawh hna dih. Sakhan hmunhma an thianhhlimh lio zongah SAC ralkap Battalion 422 hna nih hriamngan in an kah hna tiah an langhter. Credit: The Chin Post