Mipi Sualnak Neilo Bak Miminung 9 Ralhrang Hna Nih Cun Meikhangh Hna Hnu Ah

Shan ram chaklei Yuangan  peng ah minung 9 cu SAC ralkap nih an bu ning in, meikhangh in an thah hna, tiah Shan Human Rights Foundation in ṭuanvo ngeitu nih nihin May 11 ah thawng thanhnak an tuah.

A luancia April 19 ah Yuangan  peng, Peyintawng, khua mi pa 9 cu SAC ralkap nih an rak tlaih hna. Cu khua mi 9 cu an dihlak in nitlaklei hmun rawn pakhat ah motor ke tyre ponmi lak ah meikhangh in an thah hna, tiah Shan Human Rights nih an thanh. Cheukhat ruak cu a kaang dih lo i, cheukhat an takpum ah cun naam hma le kuan hma hmuh an si, tiah an chim.

Yuangan  peng cu Danuh mah tein i uknak nawl ngei mi hmunhma chung ah um mi an si. Cu hlan ah cun SAC ralkap sakhan a um lo nain, atu hnu ah cun tualchung hriamtlai phu PDF thazaang a ṭhawn tuk caah SAC ralkap hna nih cuka hmun ah an minung an thlah hna, tiah Shan Human Rights Foundation in ṭuanvo ngeitu nih an chim.

Cuka hmun ah cun Eastern Regional Military Headquarters kuttang Kalaw um mi khah-mah-yiah 112 le 115 battalion le Yatsauth, um mi khah-mah-yiah 508 le 509 battalion hna nih cawlcanghnak an tuah, tiah an chim.

SAC ralkap chimphuannak nawlngeitu General Zaw Min Tun cu Yuangan  khua mi 9 meikhangh in thah an tonnak kong ah RFA nih April 29 ah bia halnak an tuah nain, “Cu thil a cang mi kong he pehtlai in zeihmanh ka thei lo, tiah Gen. Zaw Min Tun nih cun a leh hna.

Thawngpang:  KhinOo Pengchung Ah SAC Ralkap Kut In Minung 144 Nunnak A Liam.SAC ralkap nih mithah lainawnnak a tuah ruangah KhinOo pengchung in civil mi nunnak a liam mi hna le PDF chungtel in nunnak a liam mi dihlak cu 144 an si cang, tiah nihin May 11, KhinOo PDF dirh kumkhat a tlin ni ah KhinOo PDF nih an thanh.

SAC ralkap hna nih KhinOo pengchung i rallam an sial voi zakhat leng chung ah, civil mi le tualchung hriamtlai phu chungtel a thi mi hna lengah hliam tuarmi minung 101 an um i, tlaih a tongmi minung 100 an um, tiah KhinOo PDF nih an thanh.

SAC ralkap nih KhinOo pengchung khua 28 cu mei in an khangh i, an hrawh dih mi khua hi khua 12 an si. KhinOo pengchung ah inn an khangh mi dihlak cu inn 1291 a si i, inn 153 cu khangh loin an hrawhpiak hna. Cun, inn 3 cu an phihkhar/hrenh piak hna, tiah theih a si.

Yinmapin Ah SAC Ralkap Nih PDF Pakhat An Thah Lengah Inn 6 An Khangh: Sagaing ramṭhen Yinmapin pengchung khua pakhat cu nihin May 11 zinglei ah SAC ralkap nih luhhnawh in inn 6 an khangh, tiah Naga Ngyinawng  phu nih an chim.

Monywa-Ayagyi-Kalaywah lampi ah bomb puahhnawh a tong mi SAC ralkap hna nih May 11, zinglei suimilam 10:30 ah Yinmapin peng Nibyutaw khua cu meithal le bomb puah bu in an luhhnawh hna, tiah Naga Ngyinawng phu in ṭuanvo ngeitu pakhat nih cun a chim.

SAC ralkal hna cu meithal le bomb thlah bu in khuachung ah an lut i, thingkung cung ah a kai mi ral vengtu Nibyutaw  khua tualchung hriamtlai phu chungtel pakhat cu a ṭum manh hlan ah a lu ah SAC ralkap nih an kah i, a nunnak a liam, tiah a chim.

Cu hnu ah Nibyutaw  khua inn 6 cu mei an khangh i, an kaltak. Tualchung hriamtlai Naga Ngyinawng  phu cu khuachung ah lutin mei kaang cu an hmih i, innkhat mei lawng an thah khawh caah inn 5 cu vutcaam ah a cang dih, tiah Naga Ngyinawng phu in ṭuanvo ngeitu nih cun a chim chap.

Relchap, Chin ramkulh khualipi Hakha, Leisen sang ah a ummi Karuna Mission Social Solidarity (KMSS) zung cu SAC ralkap nih May 9 zaanlei sml 5:00pm hrawngah an luh hnawh hna tiah kan theih.

Hi kong he pehtlai in, KMSS nih an riantuanmi (project) kong he pehtlai in SAC thawngthanhnak an ngeih lo caah atu bantukin an luh hnawh hna hi a si tiah min langhter awk tha lomi sin in kan theih.

A hlei khun in, Khuate lei ah chimh ding a simi Education project cu SAC nih an kham tuk caah Education he aa pehtlai mi thilri an kawl. Asinain, an hmu lo tiah theih a si.

Hi kong ah felfai deuh in a sicanning le thanh awk tha vial thanh khawhnak caah kan hlat cuahmah lio a si.

Atu bantuk in, KMSS hi 2021 March 11 ah Ralkap lei tang hlethlaitu Sa-yah-phah le ralhrang minung hna nih an rak luh hnawh bal cang hna. Cu lio ah, zing sml. 10 in zaanlei 5 tiang tluk, KMSS zung chung i a ummi catlap vialte an rak zohfel dih tiah Chinland Guardian nih a rak thanh.

Kan hnu kum KMSS zung an luh hnawh lio kong he pehtlai in le cu lio thil sining a theimi pakhat nih, KMSS zung lutlai he kan rak i chawn. An rak luh hnawh ko hna. Hi lio ahhin, Ralkap lei Sa-yah-phah nih KMSS zung a umnak hi an rak thei lo i, Hakha lamton hrawng ah Facebook cahmai hmuhsak in mi an rak hal hna nak kong the Chinland Post ah a rak chim bal.

Cozah a thlen caan a cu cang bantuk in, NLD chan ah NGOs le INGOs pawl nih riantuannak nawl an halmi zong a dih cuahmah i, MoU a thar in tuah a herhmi le riantuannak nawl halmi (registration) a thar in nunter a hau mi zong an tam ngai cang tiah theih a si.