Mipi Venghim Tu Ding Ah Kawl Ralkap Nih An Chiah Mi Tilawng Pi Cu, An Mah Ralkap Lila Nih An Kah.

Kani Khuapi Chaklei Chindwin tiva cungah rallokap le Mipi ralkap an I kap. Sagaing ramthen Kani khuapi chaklei Chindwin tiva cungin a kalmi ralkap tilawng 2 le mipi a vengtu ralkap karlak ah tuni chun 12:00pm hrawngah kahnak a um I rallokap tilawng pakhat mipi ralkap nih an lak piak hna tiin theih a si.

Kani peng King khua, chaklei king khua, Mihcawngkun, bin khua mah ka khua hrawngah hin an I kap tiah theih a si I rallokap pawl hriamnam cheuhkhat zong mipi ralkap nih an chuh khawh hna tiah Kani khuami pakhat nih a chim. Mipi ralkap lei in rallokap ralkap 7 an tlaih hna I, ralbawi pakhat ai tel tiah an chim nain fehter a si rih lo. Kap hnih in a thimi an um le umlo zong biafiang theih a si rih lo.

King khua hi Chindwin tiva kamah a ummi a si.Chindwin tiva in ralkap nih hriamnam le thilri pawl tilawng 2 in an rak rat lioah an I tawn hi asi. Khat lei in mipi ralkap nih an kah ve hna I Chindwin tiva cungah khat le khat an I kah hi a si tiah Kani khuami nih a chim. Kap hnih I kahnak a fah caah zanlei sangah cun rallokap pawl cu Aungsuhmun tilawng pakhat an hlan I ralkap 50 hrawng an rak I chap tiah theih asi.

Ralkap an rak I chap caah dohnak a fak chin.Tuni cu ruah a sur tuk fon nain atu tiang kahnak a dai rih lo tiah khuami pakhat nih zan lei ah a chim. Sagaing ramthen hrawngah hin april 15 in a tu tiang hi pehzulh in kahnak a um lengmang. Ral I dohnak ruangah khuami a thongin ramlak ah an zam cang.

Kani ah atu bantukin dohnak a um hi Monywa sandah an piah lio ah tlaih a tongmi mino pakhat Kalewa lei an thial lai timi thawngpang le Kani khuapi ah ralkap thazaang chap dingin tirawl le thilri hriamnam an rak kuat timi thawngpang ruangah April 15 in mipi nih Monywa in Kalewa lei a rak rami motor poh kha an check hna.

Nuva hna nih an motor cu check an duh lo caah an kir I an tlik lio an mipi nih motorcycle in an dawi hna I nupa hna nih meithal in an rak kah hna hnuah ram lak ah an zam tak hna I an zamtak mi an motor cu mei in an duah piak hna. Mah motor mawng tu cu ralkap Bohmu asi I, mah thawngpang an theih in Monywa leiin ralkap an rak thlah hna caah April 15 zanlei in kaphnih kahnak ai thok cang tiin an chim.

Be the first to comment

Leave a Reply

Your email address will not be published.