Mipi Vengtu, Pasaltha Hna Le, SAC Ralhrang Hna Cu, Atu Tiangah Kahdohnak Cu A Dairih Loh.

Mawlamyine, Tanhsae, Phakanh le Mandalay ramṭhen, Nganzun  ah, SAC ralkap kahdoh an tong i, SAC ralkap 13 hrawng an thi; hliam tuar zong an tam, tiah theih a si. Mon ramkulh, Mawlamyine peng Kyaitkhami lampi ah a um mi.

SAC ralkap umnak no.565 sakhan cu Mawlamyine peng mizapi vengtu ralkap hna nih nihin April 11, zinglei suimilam 4:40 hrawng ah an kahdoh hna. Cu kahdohnak ah cun SAC ralkap 2 an thi i, hliamtuar zong an tam, tiah theih a si.

Cun, Sagaing ramṭhen Tanhsae peng, Moekhuah khua le Thanpinsait khua karlak  ah, kahdohnak cu,April 10, zaan suimilam 8:30 in zaan suimilam 11:30 tiang SAC ralkap le mizapi vengtu ralkap hna cu an i kap i.

SAC ralkap 11 an thi. Cu kahdohnak ah cun Tanhsae-PDF battalion 6,7 le TCP Mizapi ralkap phufonh an i bawm, tiah theih a si.Kachin ramkulh Phakanh peng April 10, zaan suimilam 10:00 hrawng ah Phakanh Uruh Yadana hleidonh ah.

SAC ralkap nih security an hngahnak gate pawng ah puahkehnak a chuak i, puahkehnak a chuah tlawmpal ah kahdohnak a chuak ṭhan. Hi kahdohnak ah hin SAC ralkap 3 hliam an tuar, tiah theih a si.

Relchap April 11, 2022 ah Chin ramkulh Matupi khuachung lamruk tonnak, Sanbawng lam tonnak le No.2 Sianginn kam ah, SAC ngandamnak rianṭuantu hna nih lampi ah aa chok mi hna cu.

NRC.No le covid raikhamsii chunhcianak catlap(certificate an ngeih le ngeih lo cu nifatin an chek hna, tiah theih a si.Cu catlap an ngeih lo ahcun an cheknak hna hmun ah hramhram in sii an chunh ter hna i.

nau hnukdinh lio nu pawl le kum khua upa cang mi zong an hruai hna i an chunh hna. A luan cia zarh ah khan raikhamsii aa chun cang mi zong a voithumnak i chun ṭhan ding in an auh caah a va i chun mi zong an um, tiah khua mi pakhat sin in theih a si.

Matupi khuachung ah SAC he rianṭuan lak i rian sang bik a tlaitu cu minung 30,000 hrawng raikhamsii an i chunh lawng ah a rian kaiter in, rianhmun ṭhial tiamhnak pek a si caah hramhram in raikhamsii hi a chunhter mi hna a si, tiah tualchung thawnglatu nih an chim.