Myanmar Ah Ralkap Mih Hriamnam Hmang In Uknak An Lal SRI-LANKA Ah MIPI NIH Uknak Lak  Ve Aruang

Myanmar Ah Ralkap Mih Hriamnam Hmang In Uknak An Lal SRI-LANKA Ah MIPI NIH Uknak Lak  Ve Aruang

  Vawleicungah a um setsai lo mi cu South Asia i Sri-Lanka tikulh ramah July 13, 2022 ah khan Mipi sing tampi nih an Khuapi Columbo panh in an President Gotabaya Rajapaksa(73) umnak Inn/ zungpi cu Mipi nih an luhhnawh i, Ni hnih chung cu “Aanaa” an ting diam ko.Cupinah, an PM Ranil Wickremesinghe(73) Inn zong mei in an khanghpiak dih fawn.

President le a nupi cu bodyguards-2 he Navy Craft bomhnak in an ram thlanglei Maldives ah an zam hnu’ah Poisa an thuhnak Singapore ramah an zam tha’n i, cu hnu’ah President in phuahnak caa Singapore i Sri Lanka Embassy ah a pek. Singapore nih hin Political Asylum a pe duh lo ca’ah tlawmpal ah Saudi Arabia ram Riyadh Khuapi ah Asylum in um an i tim tha’n ti’ah an chim.

Rajapaksa hi 2019 ah khan President ah thim asi i, 2023 tiang tuan ding asi na’in Mipi nih an thawl ca’ah nai te May thla i PM ah a chiah mi Ranil nih Acting President a tuan chung i,tutan zarh chungah Parliament Chairman Mahinda Abeywardana hruainak in President thar ding an thim tha’n lai.

President nih hin a unau le a tufa Mi-40 leng cu Cozah uktu ah a chiah hna i, a Upa President hlun Mahinda Paksa(76) cu PM,a Naupa Chamal Paksa -Finance Minister, hngakchia bik Basil Paksa cu DM le an tu/fa dang hna cu Minister of States ah a chiah dih hna. Cuca’ah Sri Lanka Mipi nih cun, hi Raja- Paksa chungkhar nih hin Cozah poisa vialte an ei/ an fir dih ti’ah an puh i, July-13 ram dang a thlik hnu’ah President Gotabaya Paksa umnak Innpi chungah khan Mipi nih Poisa Rupee-17.8 millions le US dolar 49000 pinah Sui-5Kgs an chuh piak i Palik sinah tha te’in an up dih.Hi pinah Nepal King bantukin Singapore Bank ah millions Thong zeimawzet cu an Nu- minin vei dawh an si. Sri Lanka hi tuhlan deuh ah cun, Upper half- developing ramah a tel ve i Burma sin zongin Siibawi (Chinmi Doctor Ni Hei- kan Pu Hei cu Mehek sa a duh dawm)zeimawzet an rak hlan kho. Cuca’ah, IMF le World Bank zong nih Poisa an cawi duh i,an rak i ning ngai tawn. President Gotabaya a Cozah hnu’ah Mipi Tax 25 percent a hniamh hna pinah an Budget 50 percent leng Defence caah a hmang.

cun Covid-19 zawtnak pinah 2019 Kum ah khan Muslims Ralhrat- extremist nih Khrihfa Biakinn, Hotels le dinh hmun Beaches pawl ah Bomb an puah ca’ah Tourists an tlawng ngam ti lo i an purphiar nak Economic betak te’in a tlahniam i, April-14 in khan an Cozah nih Foreign Reserve dollars an nei ti lo ca’ah IMF/World Bank ah 3 billions bomhnak an hal na’in an pe duh lo ca’ah ei le din, Siivai, Oil le Electrics pawl cawknak an nei ti lo i Mipi cu an buai dih i, Caatlap (Papers) zong an nei ti lo ca’ah Sianginn le Cozah Zung zong an khar cikcek.Sri Lanka nihin Ramdang sinah leiba US $-51 billions an nei i,cu hna cu IMF le Market Bonds ah 47 percent, ADB (AsianBank) -13 percent, China-12 percent, Japan-10 percent, World Bank- 9 percent, India -2 percent le Direct Investment-9 percent hna an si.

Zeiruangah dah mahtlukin Sri Lanka hi Vawlei cungah an mualpho timi mithiam pawl nih an hlethlai ningah cun;- Sri Lanka i Miphun ngan Majority Sinhalese 70 percent Buddhist nih Miphun hme Minority Tamils-20 percent, Hindus /Muslims- 10 percent pawl cungah neknak in an uk hna i, Ram chaklei kam um Tamils ethnic pawl hruaitu Prabakaran dirhmi LTTE nih Kum- 20 leng bak Federal State hal in an rak doh hna.

Hi LTTE hi Ralkap-20000 leng an um i, culio canah cun Palestinian Yaser Arafat hruaimi PLO ti lo’ah cun Vawleicung ah a thongtha bikmi pawl an rak si. Raltuknak Vanlawng le Tilawng zong tampi an rak ngei hna i, India nih Training a rak pekmi Sea Tigers tiang an rak dirh i, Cozah Navy zong nih an rak tei kho lo.1991 ah India PM Rajiv Ghandi cu Tamil Nadu State ah an rak thah hnu’in India Cozah le Israel thiamnak le bomhnak thawngin 2009 ah khan LTTE phu-2 ah an i the’n ca’ah Sri Lanka Ralkap nih an rak kulh dih hna i, an hotu Prabakaran, a fapa le an chungkhar dih lak in Jaffana le Manna Seaport ah an rak thah dih hna. Culio ah cun, Gotabaya Paksa hi Defence Minister arak si i a min a rak thang ngai. a tu i PM in May thla ah a phuakmi pa a U Mahinda Paksa hi President arak tuan lio asi. Reference: Columbo Times, India Today, The Guardian etc.