Nihin kan tuahmi hi thisat ingpuan ralthawh a si lo. Vawlei pi nih a dik lo an ti ciomi kum 70 chung sal nun hluan in

Dothlennak le Ralthawh Timi cu Aa Dang

Nihin kan tuahmi hi thisat ingpuan ralthawh a si lo. Vawlei pi nih a dik lo an ti ciomi kum 70 chung sal nun hluan in a kan tuahto tu uknak diklo kan dohmi a si. Ralthawh siloin Dothlennak rian kan tuan a si.

Tutan kan dirhmun ah a laifang dir a ngah lo. A dik le diklo kar dothlennak a si caah a dikmi leikap ttanh in a dir lomi paoh cu a diklomi a ttanhtu an si. Cucaah tutan hi raltuk sawhsawh a silo a diklomi thil doh i thlen ding timi rian kan tuah caah meithal tlaih lawng theng siloin a lamkip in kan biapi dih kan ti zungzal nak cu a si.

A dik lomi, kha ralhrang hna uknak tangah an nawl zulh i duhdim tein nun nak cha cun tilo le rawlloin kan thih ah siseh zen le kuan hma he fing le tlang ah kan thih zongah kan i duh deuh. A ruang cu kan ram le kan miphun hi Pathian nih a kan pekmi a si i cu thluachuah he a kan pek chihmi cu kilven ding TUANVO timi hi a si. Sihmanhsehlaw runven awk umlo in an kan chuh i an kuttang ah an chiah caah hmasabik ah chanchuah ding tuanvo kan ngei. Kan chanchuah lai i kan runven lai kan sersiam lai.

Kannih cu tangka tampi thap in ral va hranh i suingun chawva tampi lak ruah ah ral kan tu lo. Chawva pek in mi a hlang i mi innpil a chimmi ralkap phu kan si lo. Miphun dang va tuk in an ram lak i an vawlei chuh le an ramchung chuak suingun chawva lak dingin raltuk ah aa thawhmi zong kan si lo. Kannih cu kan nunnak thap in kan techin fapar caah kan ram kan miphun kan vawlei kan covo vialte lak than le kilven dingah hnuher loin aa thawhmi kan si.

A hlawk ding, zei kan hmuh lai timi tuak in ithawh ding sisehlaw kan rian tthing te kha kan duh deuh cio lai. Sihmanhsehlaw kan ram caah kan thisen nih luatnak ca i man a ngeih ahcun cu nak hlawk kan timi a um lo. Kan ram le kan miphun kan techin fapar vialte hi kan thisen man nak in kan sunhlawih deuh.

Nunnak hi pahnih zong ngei ninglaw a pahnih tein ka Chin Miphun le Chin ram caah ka pek lai.
Crd. Salai Aung

Be the first to comment

Leave a Reply

Your email address will not be published.


*