Nihin lila ah faak ngai in SAC ralhrang nih an hun naam hna

Kayah State chung ah a um mi Demoso Township chung ah raldohnak faak ngai aa thok tthan tiah PDF Channel nih a langhter cang. Demoso Township chung, Khuate cheukhat pawl hna cu SAC ralhrang phu nih inn an khangh, mipi an tlaih hna thilri an fir dih i an sathil an thah piak hna. Hramhram in SAC ralhrang phu nih khuami faahnak an pek hna hnu in PDF, KNDF hna nih an hun kah cang hna hi asi.

SAC ralhrang phu pawl an sual tuk cang ruang ah KNDF, PDF hna nih nihin zaanlei suimilam 5:30PM hrawng in an kah thok ve hna hi asi. Raldohnak hi a faak ngai ngai cang tiah News Light in Karenni timi nih an tarlangh.

Demoso hi kan hnu lei ah faaktuk in raldohnak a rak chuah nak a si. Mipi rungvengtu phu a simi PDF le KNDF ti in SAC ralhang cu meithal thonghrolh sawhsawh in an rak doh hna i SAC ralhrang lei cu Vanlawng tiang an rak hman lawng si loin ralhrang thazaang tam taktak in an rak doh hna. A si nain cu lio zong ahcun SAC ralhrang lei tampi an rak thih pin ah an ruak hmanh tha tein an i fimtawl kho manh lo ti asi.

Nihin lila ah faak ngai in SAC ralhrang nih an hun naam hna, Ralkap motor tam taktak pin ah Civil motor tampi an hman, cun Vanlawng thawngpang zong theih a si cang tiah tunai ah khan Update an tuah tthan mi zong hmuh khawh a si.

An langhter ning ahcun nihin in aa thok than mi Demoso raldhonak hi a sawhsawh a si lo ti phun a si ko cang, cu caah faak pi in thlacam bawm hna usih.V.O.M

Nihin October 25, zaanlei ah Hakha in a kirmi ralhrang phu hna motor 56 cu Chin ramkulh,Falam khua ah a phan tiah theih a si. Cu ralhrang phu motor chungah cun Hakha-Falam kar khua ah minung umnak inn an bauh i an firmi thil, TV, thutdan, facang le zeidang inn hmanmi thilri hna cu an phorh tiah theih a si. October 23 zinglei ah Hakha in an chuak i Ramthlo ah zaan an riak, October 24 zaancu Taal khua ah an riak .

An kalnak lamthluan ah ummi khua inn 13 mei in an khangh piak hna. Rel chap – ASEAN palai Erywan Yusof cu Myanmar ah luhnak nawl pek in mi biapi hna he tonnak le biaruahnak ngeihter dingin ASEAN nih ralhrangbu hotu cu kan hnek/nawr rih lai tiah tuzarh chungah chuah dingmi ASEAN Chairman cathanh ah a um tiin Bangok Post nih a tial. Mizapi hmuh in chuah rih lomi ASEAN Chairman cathanh ah cun.

ASEAN hnatlaknak phun 5 kha ralhrangbu nih an zulh nak ding, ASEAN palai Myanmar i a kal tikah pakhat le pakhat zumhnak ngeih ding le mi biapi hna he tling tein tonnak nawl pek ding, timi zong an i tel tiah theih a si.  ASEAN Summit cu Oct 26,  thaizing cawn nihnih ni in nili tiang, nithum chung online video in an tuah cang lai.  Tutan meeting ah ralhrangbu hotu siseh, ralhrangbu ramleng vuanci siseh sawm an tim hna lo.

Asinain Myanmar aiawhtu ah ramkhel he pehtlaihnak a ngei lomi pakhat kan sawm lai tiah an thanh cang nain atu tiang ahodah an sawm ti theih a si lo. Cheukhat nih Dr. Cynthia Maung an sawm tiah an chim nain amah nih “atu tiang an ka sawmmi ka thei lo” tiah Karen Information Center (KIC) ah a chm fawn. Cu lioah ralhrangbu nih cun ASEAN hnatlaknak phung 5 cu a si khawh chungin kan zulh ko lai tiah an chim tiin Reuter nih cun a tial. 
Crd – TCP

Be the first to comment

Leave a Reply

Your email address will not be published.


*