Nihin May Ni 19 Kahdohnak Fah Tuk Ca Ah Nungak Pakhat A Nunnak A Liam

May 19 chun hnu sml 2:45 hrawng ah Thaketa No.7 sang, Aungtapi lam ah meithal kahnak a chuak i, nu pakhat a lu ah meithal kuan nih an khen i a thi, tiah a thihnak hmun pawngkam ummi hna nih an chim.

A thimi nu hi East Yangon University ah Physics major in kum donghnak a cawng lio mi Honey Oo a si. A hnakhaw hram ah kuan 2 nih a khen, tiah East Yangon University nih cathanh an chuah. Cu lawng si loin hringtu a nu le a pu zong kah an ton caah hliamhma an pu, tiah an langhter.

NLD a ṭanhtu an si caah an inn cu an kah. A kaptu hna hi thi din in biakamnak a tuahtu phu an si, tiah mit hmutu cheukhat nih an chim. Thaketa ah University siangngakchia Honey Oo kahthahnak kong ah, thi din in biakamnak a tuahtu phu nih an kahnak video zong social media ah a langsar ngai ko nain, a dikmi a si le si lo News company hna nih fehternak a tuah kho rih lo.

Minchain pengkomh Nuaṭhuci peng block 3 Nuaṭhuci meekuang hmun a pituhhluattaw palai(MP) Naing Ṭhu Aung inn cu mei in an khangh, tiah tualchung mi hna sin in theih a si. Inn a kangh ning hi mizei an si ti theih lo mi nih mawtaw in an ra i an khangh. Inn a kangh lio ah hin meithattu zong an um lo i amah daih in a dai, tiah a chim chap.

Meikangh ruang ah hin inn cu cutlukpi cun a rawk lo nain rawlchuannak tlawmpal a kang, Mei zeitin aa thok i a kangh ti cu fiang in theih a si lo. U Naing Ṭhu Aung inn ah hin a hlan ah cun thilzuarmi pawl kan rak hmuh tawn hna, anmah cinglarualchan an um le um lo fiang in theih a si lo. Naing Ṭhu Aung hi National Unity Government(NUG) ah Defense minister rian a ṭuan lio mi a si.Crd:The chin post

Kalay thlanglei hmunram ah rallam a sialmi SAC ralkap pawl nih khuate cheukhat cu khua khat hnu khua khat in an khangh hna i Nihin May 19 zinglei sml 3:00 hrawng ah Laychia khua zong an khangh ṭhan, tiah theih a si.

Laychia khua cu May 16 ah SAC ralkap nih an rak khanghmi khua a si, May 19 zinglei ah a voi hnihnak an khangh ṭhan.

Kahdohnak zong a chuak lo nain mei in an khangh thluahmah ko hna. May 18 ah Kukual khua an khangh, nihin zing ah Laychia khua an khangh ṭhan. Ṭhialkam dih a haumi dirhmun an phan,” tiah Kalay thlanglei ralzam zohkhenhtu pakhat nih a chim.

Laychia khua cu inn 200 hrawng umnak khua a si i, SAC ralkap nih a voi hnihnak an khanghmi khua a si, An khua ning in a ciam ti tluk a si ko, tiah theih a si.

Kalay thlanglei ah rallam a sialmi SAC ralkap pawl cu PDF he kahdohnak a um lo nain, tualchung mi ral an zam karah khua khat hnu khua khat in an inn le lo vialte an khangh piak dih hna.

Kalay thlanglei ummi Ashihshi, Shiaphu, Ṭintha, Sishin, Laychia, Kukul, Shiataw khua hna telh in khuate 10 hrawng, inn 1000 leng cu SAC ralkap mei khanghnak in an ciam, tiah theih a si.

Atu lioah SAC ralkap nih an khanghmi khua chung in tualchung mi 40000 hrawng ramlak ah an zam. Eidin, sii-ai, ruahkham angki tibantuk a rannak in an herh, tiah theih a si:Crd:The chin post