NLD Tel Lo In,U Than Shwe A Mi Zumh Mi U Thein Sein Nih President A Ttuan.

Ralkap Nawlngeihnak Dih Hrimhrim Cang Seh 1948 January 4 ni ah Kawlram cu Mirang kut in luatnak kan rak hmu. Luatnak kan rak hmuhnak dingah hriamnam he Mirang cu an rak doh hna. Nunnak tampi a rak liam nain luatnak thantar an rak thlai khawh.1962 kum ah General Ne Win nih caan zeimawzat zaukphung in a kal cangmi Kawlram cu hramhram loin nawlngeihnak a rak lak caah a ceu kami Kawlram cu muihnak chungah a rak hruai.

Miphun thleidannak, nuhrin covo ceilak an rak buar. 1988 lio cozah cung duhlonak le lamzawhnak ah minung nunnak tamtuk a rak liam nain ni ceu dawh cu hmuh a rak si lo.Chin sianghleirun siangngakchia tampi nih hriamnam i lak in dothlennak leiah an rak lut.1990 kum ah Kawlram ram pumpi thimnak an rak tuah. Ralkap uknak a dotu NLD nih teinak an rak hmuh nain nawlngeihnak an rak pe duh hna lo.

Minung tampi thongthlak le hrem an rak tong.1992 kum thokin Than Shwe nih nawlngeihnak lubik a tlaih. Miphun thleidannak le nuhrin covo buarnak tamtuk an rak tuah ṭhiamṭhiam. 1992 thokin UN nih Kawlram nuhrin covo kherhhleitu dingah Human Rights Council a rak thlah colh. Nihin tiang a ṭuan cangmi hna;

1. Mr. Yozo Yokota ( Japan) kum 1992-1996 tiang a tuan
2. Mr. Rajsoomer Lallah ( Mauritius), kum 1996- 2000 tiang
3. Mr. Paulo Sergio Pinheiro (Brazil) December 2000 –April 2008 tiang
4. Mr. Tomas Ojea Quintana (Argentina), kum 2008- 2014 tiang
5. Ms. Yanghee LEE (Republic of Korea), 2014 – 2020 tiang
6. Thomas Andrews, United States of America, 2020- tulio

Hi hna pawl repawt an tuahmi thawng in vawleipi nih Kawlram chung kan harnak cu biatak in an rak theih.2010 ah ralkap nih anmah duhning in an rak suaimi 2008 phunghram ning in thimnak an tuah. Ralkap thuam ai hruk ti lomi ralkap party USDP nih teinak an rak hmuh. Than Shwe mi zumh Thein Sein nih president a ṭuan. NLD ai tel lo. 2011 thokin Than Shwe nih Min Aung Hlaing sinah ralkap lubik sinak a khinh ta.

2015 ah thimnak a um ṭhan. NLD nih cei in an tei. Nawlngeihnak ṭha tein an i pe nain ralkap nawlngeihnak a sang tuk thotho. 2020 ah thimnak a um ṭhan. 2015 nak in NLD nih teinak a hmuh ṭhiamṭhiam. Thimfung a diklo timi sualpuhnak he ning cang loin ralkap nih nawlngeihnak cu an lak. Hruaitu tampi an hren hna. Muihnak chungah kan lut ṭhan.
1962 thokin nihin tiang ralkap nawlngeihnak a sang peng.

Tlangcung miphun hna nih hriamnam i lak in kan doh peng nain kan tei kho lo. Nunnak tam tuk pek a si cang nain kan lungdongh awk a si rih lo. 2021 tutan ram chung mizapi nih lungrualnak he a lamkip in ralkap an dohning hmuh tikah ruahchannak a um hrimhrim ko. Ram chunglei lungrualnak le ram lenglei ṭanpinak a biapi tuk hringhran. Kanmah le kan ti khawh tawk cio in kan i tel a herh.

Ram chunglei nih a biapi in lamzawhnak, cozah rianṭuanmi nih zungkai lonak, belkheng tumnak tbk.. in kan ṭan a hau. Ram lenglei in kanmah le kan si khawh tawk cio chuah in chawva, thazaang peknak lethlacamnak in kan telpi khawh hna. Ai thokka lawng a si rih caah lungrual tein pehzulh a hau rih ko lai.

Credit : Biak Hmun Lian

Be the first to comment

Leave a Reply

Your email address will not be published.