Pakistan Prime Minister Imran Khan Cu Amah Zumhlonak Biatung Chuahpi A Si Hnu In

Pakistan Prime Minister Imran Khan cu amah zumhlonak biatung chuahpi a si hnu in Pakistan National Assemby nih vote an lak i, vote 342 ah 174 nih duhlonak vote pek si caah Prime Minister in thlak a si. Hi vote hi Imran Khan PM in thlak a si khawh nakhnga a herh mi vote nakin, vote in a tam deuh.

Pakistan ram PM tuanbia ah zumhlonak biatung(no confidence motion) in thlak hmasa bik zong a si. Khan hi Pakistan cozah a zohkhenh ning ah cozah phunhning kalh in a cawlcang tiah puh a si.

Hilio ah nizan zarhpini ah khan Pakistan ram khuapi Karachi le khuapi dangdang ah cun mipi 20,000 reng lo khualak ah an chuak i, Imran Khan an dirkamhnak le PM rian tlai ṭhan ding in an duhnak an langhter. Imran khan hi mino nih thazaang an pek tuk caah lamzawhnak ah a chuak mi mipi lakah hin mino an tam cem, tiah langhter a si.

Khan nih cun amah twitter ah, Hi zatzat mipi hi khualak ah chuak in duhlonak an langhter ka hmu bal rih lo. Kan ram tuanbia zong ah a hmasa bik a si, tiah a ṭial,Imran khan nih cun dohkalhtu party hna nih zumhlonak biatung an chuahpi kongkau ah hin US le nitlaklei ram a ṭuanpi hawi hna cu a mawhphortu cem a si, tiah a puh hna.

Thawng dang, April 10 ah T.Y.F le PDF- Khayan , Fire Dragon operation a si mi Thongwa, peng Aministator zung le SAC ralkap umhmun an khuarnak lentecelhnak hall cu 40mm in an kah. Cun No.6 sang ukbawi inn le No. 11 sang ukbawi zung zong kutcheh bomb in kan cheh tiah thawng an thanh.

Hlaing Thar Yar, ah hlawhfa pawl a namneh mi sehzung ngei pawl rawl an ei tawnnak hmun pawl cu zahan Sml 7:41 ah a lang in control mi bomb lung 5 in kan puah YGN PDF nih thawng an thanh i zaan Sml 11 tiang kahdoh tawng theih a si. Zaan Sml 10:30 ah Hlaing Thar Yar Tamakone le Dagon Ayeyar, highway lam pawng ah a fak ngai mi bomb puah thawng kan theih tiah tualchung mi nih an chim.

April 8 zing Sml 5:30 zong ah khan Thanlyin peng yungdaw, sang Minyecawsua, lam ah ah aummi Mytel zung bomb kan puah tiah Urban Guerrilla Force Thanlyin-U.G.F Thanlyin nih an thanh i cu mission cu United Warrior Force he i bawm in an tuah mi a si tiah theih a si.

Cun April 10 zinglei Sml 3:48 ah Myandalay ramthen, Taungthar peng Taanphuzayat pawng ah Bohmu pakhat aa tel mi SAC ralkap motor cu a neih tein kan kah i ralkap 2 an thi tiah PDF nih thawng an thanh. SAC kuthman(a bawm tu) Kabalungtaung, datsi dawr cu nihin zinglei ah bomb lung khat puah in ralrin nak kan pek tiah PDF nih an thanh. Crd: The Chin Post.