Ralhrang Captian Pa I Anu Le Pa Cu An Thah Hna

Mogok i ralhrang captain Kyaw Myo Hein I a nu le pa a cu SAC ralhrang dirpitu U Myo le Daw Cho te nupa cu thah an si.vMandalay ramthen, Mogok khawpi, Aung Thu Kha veng i khua a sa mi SAC ralhrang dirpitu Dalan tiah minthang tak mi hna, ralhrang Engineer captain Kyaw Myo Hein i a nu le pa U Myo le Daw Cho nupa cu April 2, zinglei sml 9 hrawngah an inn hmai te ah aho ti theih lo mi hriamtlai pawl nih an luhhnawh i an kah hna, tiah theih a si.

SAC ralhrang hna sinah  mipi kilveng tu le dothlen nak ah acawlcangh mi hna an thawngpang a chim lengmang ton tu U Myo le Daw Cho Cho nupa hna cu ralhrang Ingineer captain Kyaw Myo Hein i nu le pa an si. Cun an fapa ralbawi a sinak ruangah hin  sangchung i aum mi pi pawl cu holh thalo in an hro lengmang hna, tiah sangchung khuasa hna nih cun an chim.

Atu i kah atong mi nupa hna hi 2021, December thla lio zong ah kha aho ti theih lomi, hriamtlai hna ni an rak kah bak cang hna i sizung tiang an rak phan bal cang tiah theih a si. SAC ralhrang captain Kyaw Myo Hein i nu le pa cu hriamtlai pawl nih an kahnak hriamhma tuar manh loin an kahnak hna an inn hmunbak ah an thi colh, tiah an theih asi fawn.

Myanmar ram pumpi in dohthlennak tuah hnu April 2, 2022 nikhat chung kahdohnak ah SAC ralkap 84 an thi i, PDF lei in minung 2 an nunnak liam, tiah Yangon Khit Thit nih a thanh. Cazin ning ah SAC ralkap le a thi mi hi Chin ramkulh Mindat ah 50, Matupi ah 6, Sagaing ramṭhen Ayadaw ah 7, Myaung peng ah 4, Mongwa University ah 10, Pyin Oo Lwin ah 5, KNU bridage 5 ah 2, an dih lak 84 an si. PDF lei in Yinmapin ah 2 an nunnak liam ve.

Mong Ko Ah MNDAA Le SAC Ralkap Kahdohnak A Chuak: Shan ramkulh, Mong Ko pengkomh, Da Mine Pho ah MNDAA ( မြန်မာ အမျိုးသား ဒီမိုကရေစီ မဟာမိတ် တပ်မတော်) le SAC ralkap hna cu nihin April 3 zanlei Sml 2:15 hrawng ah faak ngai in an i kap, tiah tualchung thawnglatu hna sin in theih a si. Hi kahdohnak ah a thi mi le hliam tuar kong thawng fiang theih a si rih lo.

Tayatchawng Peng Mekae Khua Pa Pahnih SAC Ralkap Nih An Thah Hna! Khua Zong An Duah, Taningtari ramṭhen, Tayatchawng (သရက်ချောင်း) peng Mekae (မယ်ကဲ) khua cu SAC ralkap nih April 2 chunhnu suimilam 2:30 hrawng ah luhhnawh in khuachung um mi U Lin Mawng le Ko Tan Htay cu an thah hna leng ah mipi umnak inn zong meikhangh in an hrawhpiak hna. Cun, minung 22 cu ralphaw ah an tlaih hna, tiah khua mi nih an chim.

SAC ralkap hna nih cun khuachung ah hriamngan kah bu in an luhhnawh hna i, culio ah zaam aa tim mi U Lin Mawng le Ko Tan Htay cu meithal in an kah hna caah an nunnak a liam, tiah theih a si.

SAC ralkap hna nih khuachung an luh hnu ah khuachung um mi NLD Party Chairman hlun si mi U Suh Kyine, U Aung Myint le Daw Merry inn ah lut in thilri an fir dih, inn zong an khanghpiak hna. Khuachung mizapi cu an zaam hna caah meihmittu um lo in, inn tampi ah mei a lawn, tiah theih a si. Cu SAC ralkap hna nih cun khua mi minung 22 cu ralphaw caah an tlaih hna i, khuachung ah umhmun an khuar, tiah theih a si.