Ralhrang MAH Hruaimi Phu Kut In Covid Ca Bawmhnak Phaisa Nuai In A Tlau

Ralhrangbu nih nawlngeihnak an lak lai hrawngah International Monetary Fund (IMF) nih Myanmar ram covid-19 khamnak caah tiin bawmhnak a pekmi US Dollar nuai 372 (372 million) cu ralhrangbu kut ah a tlau tiah IMF nih Nov 3, tuni ah an thanh. MAH ralkap nih thil an tuah mi ah mah hi cu a tha ko tiah ti awk pakhat taktak te hmanh a um lo ti awk a si ko tiang ah cun!

IMF chimnak nawlngeitu nih “Hi tangka hna hi Myanmar ah kan kuatnak thla 8 a rau cang nain ralhrangbu nih covid khamnak ca le harnak a tongmi hna bawmhnak caah an hman le hman lo zong kan thei lo” tiah thawngfianternak ah a chim. Cu lawng si loin ralhrangbu cu Suh Kyi hruaimi NLD cozah bantukin tangka hmannak kongah an felfai lo tiah a chim fawn.

IMF bawmhnak hi June 2020 ah Myanmar cozah sinah a phan. IMF le Myanmar cozah karlak ah hnatlaknak an ngeihmi cu hi bawmhnak tangka hmangin tuanmi, MMK (Myanmar tangka) in nuai 100 leng rian paoh cu IMF theihter ding, cun Myanmar cozah cazin chek zung nih covid he pehtlai in thla 3 voikhat IMF sinah theihternak tuah ding le cathanh chuah ding ti hna an si.

Kum 2020 chungah IMF nih Myanmar bawmhnak a pekmi dihlak cu US Dollar nuai 728 a si i hi bawmhnak hi vawleicung ramkip i tangka lut a tlawmmi le ngandamnak a chambaumi chungkhar hna sinah IMF nih bawmhnak pek dingin a khiahmi chungin Myanmar zong an pek vemi a si.

Asinain ralhrangbu nih IMF bawmhnak kong he pehtlai in atu tiang zeibantuk theihter hmanh an tuah lo. NLD cozah nih khan Jan 29,2021 ah theihternak an rak tuah i cucu a hnu bik a si. NLD theihternak ca ah cun IMF bawmhnak tangka hmangin kut-hruk, hmur-huh le sii kan cawk tiah an langhter. Ralhrangbu sinah cun IMF nih bawmhnak kan pe ti lai lo tiah IMF chimnak nawlngeitu tu nih thawnglatu hna sinah a chim.

RF

Be the first to comment

Leave a Reply

Your email address will not be published.