Ralhrang Pawl An Mah Le Mah Motor An I Pah

Nihin cu ramchung um mi vialte aho hmanh lengchuak lo in Ralhrang duhlonak langter nak (silent strike) an tuah lioaha Mandalay khuapi ah chun suimilam 2 hrawng ah khan ralhrang motor 2 cu an mah le an mah an I pah I ralhrang minung 4 cu fak ngai in hliam hma an tuar tiah thawng theih asi.

Social media cung I hmantlak ah alangh ning ah cun ahmat 34 lamcung ah Double cab ralhrang motor asi mi pakhat cu adir I ralhrang pa 2 cu lamcungah an ril adang pa 3 nih lamcungah aathek mi meithal le an hman mi thilri pawl cu an chiar lio hmuh khawh asi.Silent strike lengchuak lo in duhlonak lanhter nak cu zinglei suimilam 10 in zanlei Sml. 4 tiang tuah asi. Hi chungah hin ralhrang hna lawng hi minung kalnak lam ah aum mi an si. Silent strike hi kawlram chung hmun dihlak ah tuah asi i, Chinram chung i khuapi hna Hakha, Falam, etc,… hna zong aking duh ko.

CDF-Thantlang Mino 3 Ruak Nihin ah an Khua Cio ah an Vui Hna

December 8 ah Thantlang khuachung kahdohnak ah a nunnak a liammi Salai Ram Lian Peng, Salai Van Tha Ceu le Salai Bawi Za Uk hna i an ruak cu nihin ah an khua cio ah an vui hna, tiah thawngpang kan theih.  Nizaan December 9 ah khan CDF-Thantlang ralkap pawl nih kahdohnak lak ah an ruak an vung lak khawh hna.Sopum khua upa pakhat nih, Nizaan ah khan CDF-Thantlang kan naule nih an pathum ning tein an ruak an lak khawh hna. Zaan sml. 7:30 hrawng ah kan khua ah an rak phakpi hna. Kan naule pathum an lu an um ti lo. Thlacamnak kan tuah hnu ah anmah le khua lei cio ah an phorh hna, tiah The Chin Journal ah a chim.

December 8 ah Thantlang AG biakinn pawng ah inn duah a timmi SAC ralhrang pawl cu CDF-Thantlang nih an kal hnawh hna tik ah timhcia tein a rak hngaktu ralhrang pawl nih ruah lo piin an kah hna caah mithi le hliampu an umnak hi a si. Thau khuami Salai Van Tha Ceu i a ruak cu nihin chun sml. 11:00 ah an vui cang.Thau khua upa pakhat nih, Salai Van Tha Ceu ruak cu nihin zinglei sml. 6:00 hrawng khan khua ah an rak phakpi i, sml. 11:00 ah a ruak kan thlak. Ruakuang chung ah a ruak cu kan chiah i ahohmanh zoh ter ti loin cuticun thlacamnak tein kan vui,” tiah a chim.  Salai Ram Lian Peng le Salai Bawi Za Uk hna i an ruak zong Zephai le Hriangkhan ah an tlunpi hna i nihin ah ruak an thlak ve hna, tiah thawngpang kan theih.

Be the first to comment

Leave a Reply

Your email address will not be published.