Rassia Le Ukriane Konglam Dih Lak In, Theih Na Duh Ah Cun, Rakrel Ve Hrimhrim Na Reldih Bak Ah Cun, Rassia Le Ukriane Kong Lam Cu Na Fiang.

Ral a thawhka hrawng i an lakmi khuapi pawl Russia nih an chuahtak hnu Saturday in khan cun Kyiv velcheh cu Ukraine nih an vun lak khawh than cang. Cu ticun, ralthawh tih a nun zia, aho hlawm le hramh hmanh tonglo in mipi ruak an rilh tung kha Russia nih a thawhtermi ral nih a langhter.

Kyiv in northwest ah a ummi Bucha khua chungah thawnglatu an vung kal, lam cung i miruak phah nelnual in an um kha an va hmuh. Video an zeih hna. Cu video cu Washington Post zong nih fehternak a tuah i, hngakchia pakhat tel in ruak 9 bak an hmuh.

Thlan nganpi 2 kan cawh i cuka ah cun a tlawmbik minung 270 hrawng cu ka khuami kan vui hna, tiah Bucha major Anatoly Fedoruk nih interview lio ah a chim. Minung 40 hrawng cu lam cung a thimi an si, tiah a chim. A cheu cu hren bu tein thah a tongmi an si  an tukbukhur zawn i kah a tongmi an si hna. Cu kan minung pawl ruak cu an paw ah bomb rap tarhnak dingah Russia nih an hman lai kan phang ngaingai, tiah a chim.

Kan hmunhma vialte ah Russia nih bomb a thlak dih cang, tiah President Zelensky nih Saturday ah khan a mipi a thanh hna.Inn le lo, hriamnam chiahnak, cun an thah cangmi miruak hmanh zuah lo in bomb in a puah dih hna, tiah a chim. Cu a chimmi cu The Washington Post nih fehternak a tuah lem rih lo.

A tu bantuk i Russia nih lainawnnak le miram vatuknak, cun nichuahlei pengkulh i daitein duhlonak a langhtertu pawl a ralkap pawl a kahter mi zoh tikah, a kaptu hna Russia doh le tei ai ruahchan ngaimi Ukraine mipi caah ruahchannak a donghtertu thil an hung si.

Tutiang ko rih ah cun an khualipi hi a him ko rih. Asinain, nichuahlei le chahlei belte ah cun bomb thawng le kahdoh thawng lawng a leng peng ko rih. Tanglei i kahdohnak a fahtuk tikah, Russia nih an laakmi khuapi chungin Ukraine mipi chanhchuah an i timhmi rian hi khualrang in an kalpi kho lo.

38nak tiangah a fiangmi a phih chuahpimi a um kho ruam rih lo. Russia hnungtolh bantukin ai umtermi nih hin cansau a rau lai tiah ruahmi tutan ralpi i a sining le muisam a mawpter dih, hliah khawh a si lo. Cu nih cun raminnpa ah a zammi Ukraine mipi milliom tampi hi an ram kir than kho zau lo dingin a tuah te hna lai.

Rilikap khua Mariupol i kahdaihnak an tuahmi cu ni tamlak a nguhdaih ko rih. Cu nih cun khuami caah zamnak caan a serpiak khawh hna. Asinain, a him thlu taktak lo caah, Red Cross pawl an vung phan kho lo. Kan team in kan i thawh than, Mariupol phak kan i duh ngai ko rih, tiah Red Cross aiawh biachimtu nih a chim.

An ralkap pawl a thar in vun timhlamh than dingin Russia ralbawi pawl nih biachahnak an tuahmi he pehtlaiin Western military mifim pawl nih a sullam an hlaithlai lio pi a si. Ukraine nichuahlei hmunhma hi kan i hmaithlakmi a si, tiah.

Russia officials pawl nih an chim. Nawlnolh in timhlamhnak an ngeihmi zoh tikah Donbas hi faakpi in vun tuk i a ningpi in vun lak an i tim, ti a lang. A tu lio hrawnghrang cu, Ukraine a tuknak kongah a hlawhtlinnak le sunghnak kong Putin nih a tuak len lio a si lai.

Kyiv nih a huammi hmunhma vialte cu Ukraine kan kutah a um cang, tiah Saturday ah khan Ukraine deputy defense minister Anna Malyar nih a chim.Russia pawl cawlcangh a hnumdeuh ngai, asinain an cawlcang, ti cu theih khawh a si ko rih. Cucaah, ral nih a chiatchuahtuk cangmi ka ram hi nan vun bomh cio nak lai kan nawl ko hna.

Mariupol i rawk nelnul inn le lo kar i himnak kawl in a vak a vaimi kan mipi pawl an tuarnak hi kan theihpi hram u, tiin Zelensky nih a ramdanghawi pawl a nawl hna.Mariupol ah a tlungmi he pehtliin in Europe hi daitein umnak nawl ai ngeih lo dawkaw. Hi tlukin a faakmi minung hawi tuarnak hi vawlei pumpi nih a zuanhnawh hrimhrim awk a si, tiin Zelensky nih a chim.

Ralthawh timi a musiam a thleng khotu dirhmun phan kho a si cuahmah mi tutan ral hi linhsat a panh cuahmah ko rih caah, a tu bantukin Zelensky nih bomh a herhnak kong a langhter hi a si.

Western mifim pawl nih an zumh ning hna a va si tak ko ah cun, Putin nih Ukraine nichauhlei hmun hi a ningpi in a uk khawh sual ah cun, 2014 lio i a lakmi Crimea he hlathlainak kaupi a tuah te khawhmi a si. Asinain, cu saduhthahnak nih cun Russia mipi an lut a lak kho theng hna lai lo.

Asinain, tutan i Kyiv le Chernihiv velcheh i kahdohnak mak chung rih dingin Russia le Ukraine palai pawl lungtlinnak an tuah hnu cun, ralthawh a dirpitu an lung a dong ngai.

An boot keden an hngawng i awih an si hlan i Nazi (Ukraine) pawl he lungtlinnak ngeih cu derthawm bia a si. Mi hrokhrawl pawl an kut na tlaih awk a si lo, tiah Russia state TV biachimtu Vladimir Solovyov nih Thursday ah khan a chim. Mi hrokhrawl a ti mi cu Velensky hi a si.

Ukraine ram lak kan i timhmi hi ai thok lawng a si. Cucaah a donghtiang kan kawl awk a si ko. Kan Russia ralkap hi miraltha an si. An zumhnak hi an sinin ahohmanh, zeithil hmanh nih a chut kho hna lai lo. Tuanbia ah ai tial cang hi aw, tiah Kremlin a tanh ngai mi thawnglatu Semyon Pegov nih a War Gonzo cazual ah a tial.

Ral an thawhter le cangka an lak colhmi airport zong cu an zaamtak than cang. Belarus he an ramri tiang Ukraine nih hmunhma an vun lak khawh than cang. Chernobyl nuclear sehzung zong an vun lak khawh than cang.

A ralkap thazaang vun remhsiam duh i a tu bantuk i hnung a tolhmi nih hin Kyiv kilvennak kongah Ukraine pawl an dai a thlanter cang hna, tiah Brookings Institution i defense analyst Michael O Hanlon nih Saturday ah a chim. Zenlensky nih hmunhma an khuarnak vialte vun phuang seh, ti hi Russia nih an duhmi a si, tiah a chim.

Ukraine pawl an i ralrinnak nan daithlanhter khawh hna a si ah cun, Zelensky le a chungmuru taktak le a cozah chungtel pawl nan von doh khawh lai. Ukraine pawl an cawlcangh i palh ding i vun tuahkhawhnak a lam Russia nih ai ngeih ko rih, tiah ka ruah,” tiah O’Hanlon nih a chim.

Kan hnung hrawng kha cu kahdohnak ngol chung dingin kaphnih hnathlaknak an ngei ko nain, Russia i a lungthin ai thattermi kongah Ukraine a dirpitu pawl an lung a hring ngai ko rih.

A tu bantuk i Russia nih kahdohnak ngol chung rih dingin khua a khanmi hi zoh tikah, ai ruahlo ningin ral a sungh cuahmah cang caah, a ralkap pawl an dirhmun vun siamremh than le an thazaang vun thawnter chin ai timh caah a si ko, tiah Western mifim pawl nih an lunghrinnak an langhter.

Turkey ah Zelensky le Putin tonnak ngei kho dingin kaphnih officials nih timhlamhnak kan ngei, tiah Ukraine aiawh in Russia official a vung tongtu David Arakhamia nih a chim,A rauhhlan ah Mairupol siseh, chaklei le nichuahlei ah raltuknak faakpiin a thawh than lai caah, timhlamhnak ngei cio u, tiin Ukraine president advisor Oleksiy Arestovych nih national TV ah a chim.

Nichuahlei Zaporizhzhia pawng i duhlonak a langhtertu pawl Russia nih mortars in an khah hna i minung 4 thaloin meihma an pu. Hi hmun hi nuclear sehzung hmun a si, tiah Ukraine human rights ai awhtunu nih a chim.

Zarh 4 chung Russia nih an uk cangmi Enerhodar i khuami hna nih Saturday ah khan Ukraine lei tangin duhlonak an langhter. Duhlonnak langhtertu pawl teoter an duh hna caah Russia nih ceu/thawngpang bomb in an kah hna. Cun mortar zong in an kah hna, tiah Lyudmyla Denisova nih Telegram ah a tial.

Rome Statue of the International Criminal Court nih a chim ning te ah cun, cu bantuk i mipi serhsat cu minung hawi cung i thatlonak tuah le, war crime buar a si, tiah Denisova nih a chim.

A hmun i a va hmutu hna nih Telegram i an tarmi video 2 cu The Post zong nih fehternak a tuah cang. Hman an tlakmi le video an zeihmi cu a kil kip in an zoh i, a tlawmbik in bomb zun 9 a puak, tiin an fehter. Duhlonak langhternak hmun in mipi an zam lio i meithal in an kah chih len thawng zong video ah an thei.

“Khuapi laifang ah kahdohnak a tlung. Lainawngtu Russia nih mipi an kan kah. Daitein duhlonak kan langhter ko” tiin The Post nih a fehtermi video pakhat ah mipa pakhat a au len ko kha theih khawh in a um.

Khuami pawl i thiar fihlim ta dingin Kyiv le Moscow lungtlinnak an ngeih hnu ah, Russia nih an kahmi khua pawl cu Ukraine mipi a thong a sang nih an chuahtak hna. Ukraine pumpi ah minunghawi i bomhchanhnak a lam 7 an ser khawh. Mariupol zongah pakhat a um cang, tiah Ukraine Deputy Prime Minister Iryna nih a chim. Friday ah khan minung 6000 renglo kahdohnak khua in a himdeuhnak hmun lei ah kan thial khawh hna, tiah Iryna nih a chim.

Cu a zaammi pawl lakah minung 1,400 hrawng hi cu anmah le an motor tein Russia nih an ukmi Berdyansk le Melitopol khua in Zaporizhzhia peng lei ah an zam kho hna. Cun, anmah le an motor tein Mariupol a zamtak khomi zong a zaza an i tel. Cun, Mariupol khuami cu bus 42 nih an phurh hna i Zaporizhzhia lei ah a kalpi hna.

Chaklei Ukraine a ummi Mykolaiv khua i missile nih a khen hna ruang i a thimi hi 32 an phan, tiah Saturday ah khan governor Vialiy Kim nih a chim,Inn nganpi cu thek dih in missile nih a kah caah, a thimi cazin chung a lut rih lo mi hi tampi an tang rih. Minung 30 renglo hma an pu. Ruak zong an vui hna.

Tutan ralpi nih vawleipi a hninh dih i, kan vawlei a heltu tiangin a tlirhkhonh dih. International Space Station program i kan ram ai telmi hi mak dingin capar ka tiin lai, tiah Russia space agency director nih a chim.

Russia rocket le space industry tampi cungah phihkharnak an tuahmi khong hi Roscosmos agency lubik Dmitry Rogozin nih a chim duhmi cu a si. Phihkharnak nan tuahmi hi vun kan lakpiak than ko u, tiin Dmitry nih a NASA le, Canadian Space Agency le European Space Agency sinah nawlnak a tuah ko nain, hawi kan sinak a zawn cu a fiang ko, asinain phihkharnak cu kan in lakpiak kho lai lo tiin an leh.

International Space Agency ah le a dang rian kan tuahtimi ruang i khat le khat kan i pehtlaihnak vialte punghman te i a kal khawhnak dingah cun kan cung i phihkharnak nan tuahmi vialte hi vun kan thialkampiak u law a tha, tiin Dmitry nih a chim.

Dmitry hi ai hrocer thulh, biaka in thihphaih hna thulh, Russia nih kan i pehtlaihnak hi a chuahtak te ko lai, tiin a tlerhkhonh hna thulh in bia a chim. Russia space riantuantu 2 le NASA riantuantu 1 Space station in an tlunnak in ni 3 hnu ah a tu bantukin a chim hi a si.

Russia nih Feb. 24 in Ukraine a luhhnawh hnu ah NASA nih thatein rian kan tuah ko, hna a kan hnawh lo, tiah an chim. Russia tello in cun kan Space station hi kan kalpi kho lai lo, zeicahtiah vawlei kan helnak lampi chung i kan station a um khawhnak dingah a herhmi thil hi anmah Russia ta a si, tiah NASA nih a chim.

Russia cung i phihkharnak tuahmi kongah an lung a tlinlonak kong Saturday ah khan China nih a langhter. EU le China karlak ah video in meeting an ngeih hnu ah a tu bantukin bia an chim hi a si.Phihkharnak hi kan doh. Phihkharnak nih hin kadang hmunhma zong a hnursuan dih ding a si, tiah China Foreign Ministry ah European affairs kongkau i general director Wang Lutong nih a chim.

Russia nih Ukraine a tuk hnu in EU hruaitu pawl nih China an tlerhkhonh hna. Russia nih mi ramdang a tukmi rian na bomh mi ngol law, daihnak ca tu ah rian tuan, tiin an ti. Asinain China nih hnung a tolh tak diam hna.

“Ukraine buaibainak kongkau ah China hi kan i pehtlai lo. Cucaah zeibantuk ram he hmanh punghman chawhlehnak kan tuahmi hi a hnursuan awk a si lo. Russia he punghman te i chawlehnak kan tuahnak thawngin global economy caah China nih riantha kan tuan,” tiin Wang nih a chim.

Kyiv ah khualtlawn ai timhnak kong Pope Francis nih Saturday ah a chim. A tu bantuk i khualtlawn ai timhmi hi anmah Ukraine political le biaknak hruaitu pawl nih sawm hna sehlaw a dawh in an chim.Si, kan i ceih lio pi a si” tiin Francis nih a chim. Asinain a dikdiar in cun a chim hna lo, tiah Reuters nih a chim.

Vatican lei nih an chim ningah, Zelensky hi Pope he voihnih phone in an i chawn cang, ti a si. Cun Kyiv Major Vitali Klitschko he Ukraine tlawng dingin an sawm. Ukraine ah Roman Catholics an thahnem ngai. Asinain, a tam u cu Ukrainian Greek Catholic Church an si ngawt hna.Ukraine ral cu biaka hrimhrim in Francis nih sual a phawt i, lainawn le thatlonak nifitin in nolhcip in a chuahpi tu, molhtamh thil a si, tiin a chim.