Refugee In Ramthumnak Kal Kong Fiang Tatak In An Chim

UNHCR Malaysia i ramthumnak kalumnak tawlreltu DSU (Durable Solution Unit) le ralzaam bu hruaitu upa hna cu March 24, 2022 ah biaruahnak an nei. Hi tonbiaruahnak ah UNHCR-DSU an riantuanak kong fianternak le zeibantuk ralzaam hna hi dah ramthumnak ah papek in kuat an si timi hrilhfiahnak an nei.

An chimmi cu ralzaam asimi hna caah ramthumnak kal hi covo (right) asi lo an ti. Min khumhmi (registered) poh ralzaam sinak (refugee status) an hmuh dih lo. Ralzaam sinak (refugee status) a hmumi poh ramthumnak an kal lo an ti. Cun ralzaam a latu ram nih an kan halmi hoih in kalter an si ti zong an chim. UNHCR nih ramthumnak kuat ding ah zohmi phun 7 kan nei i mah hna chung cun thim le ruahpiak an si an ti. Cu phun 7 hna cu:

1. Tonmi pakhat khat ruangah runvenpiak a haumi 2. Na sining ruangah hremnak in a luatmi 3. Nu pawl harnak a ingmi 4. Ngandam lonak ruangah harsatnak a tongmi 5. Chungkhar a va i fonh dingmi 6. Hngakchia kumtling lo harnak a tong khomi 7. Hmailei kong ah ruahchannak a tlawm.

Cun hi hna pawl hi kan mah DSU (Durable Solution Unit) nih kan kawl hna lo, Department dang le NGO tibantuk nih kan sinah an rak kuatmi hna tu kha ramthumnak kal khawhnak ruahpiak dingah aa tlak maw tlak lo ti kha interview in siseh phone chawnhnak siseh dothlatnak kan tuah tiah an chim. Interview kan tuah hna hnu ah aa tlakmi cu a cohlangtu ram sinah kan kuat hna. Kan mah (UNHCR) nih kan kuatmi hi an kal hrimhrim lai tinak asi rih lo.

An kalnak ding ram nih an mah le an phung le lam ning in cohlan khawh lo zong asi rih an ti. Tahchunnak ah UNHCR nih na case kha US kal ding in an kuat i US interview (DHS – lahwahkah) interview na sungh ahcun UNHCR nih zeihmanh an tuah kho lo tinak asi.
Cun lamdang in (UNHCR si loin) lawm a awngmi pakhat cu ramthumnak a um ciami chungkhar, cingla rualchan nih auhnak tuahpiak hi asi an ti.

Tahhchunnak ah Canada sponsorship le Australia Humanitarian visa tibantuk khi asi. Cun a tu lio ah kan i zuam cuahmahmi cu ramthumnak ah sianginn kai ding le riantuan ding ah va kal khawhnak ding lam kan i zuam cuahmah lio asi an ti. Siaherhnak he CRC Malaysia.