Relcio Uh Khah Kum Thum Voikhat Tuah Tawn Mi Ram Pumpi Thimnak Federal Election Ah Thil Si Ning

21st May 2022 cu kum thum voikhat tuah tawn mi ram pumpi thimnak (Federal Election) a si. Australia ah cozah tlai kho Party pahnih an i pai peng, cu hna cu Liberal Party le Labor Party an si. Cozah ser khawh nakding ah House of Representatives thutnak 151 chung ah 76 hmuh a herh. Tutan thimnak ah Labor Party nih thutnak 72 an hui cang, thimfung rel cuahmah lio a si rih.

Liberal Party nih peh thluahmah in kum 9 a kan hruai chung ah ram mi a deuh hna maw si hnga, tutan thimnak ah an tla ngaingai, Independent in ai cuh mi hmanh nih an thah deng hna. Rampi ngunkeng zong Independent in ai cuh mi nu nih a thah deng. Liberal Party 52, Independent 10, Greens 3 le adang hme tete nih pahnihkhat hmuh in rel lio a si.

2022 thimnak bual cotu hi Anthony Norman Albanese a si. Kingro ngaktah, mipumtlinglo nuhmei cawmkennak in a thanglian mi a si. Nuhmei farah a si tikah umnak reprai hmanh an ngei lo i acozah inn (public housing) ah mi zohhar in khuasa an rak si. A nu hi ruhcaang hliah fah zawtnak (arthritis) in a ngawr mi, tlamtlinglo tar cu thlahlawh (disability pension) in fapa fangkhat cawmtu a si.

Hringtu pa mui hmu lo Anthony hi a nu nih na pa cu mawtaw accident in a thi, tiah a rak hlen (lungfah ruah lai phan ah nupi ngei tiah a chim ngam lo). Nungna ngaktah fa in pa ngei lo dirhmun in a thanlianh lio ah thing-kak lung-kak fa, lakfa tiah soisel le hmuhsip a tong peng, sinain nikhat khat cu mi ah na chuah te lai sawh, ti’n a nu nih thazaang a pek peng ti si. Nihin ah cun tuanbia tialtu ah a cang taktak. 1996 kum in Australia Parliament ah a lut.

2007-2010 chung ah Minister for Regional Development and Local Government rian a tlai. 2007-2013 House ah haotu a si pin ah, Minister for Infrastructure and Transport a tlaihchih. June 2013-September 2013 chung Deputy Prime Minister of Australia a tuan. 2019 thimnak ah a Party chung in Bill Shorten a tlak hnu in Labor Party haotu sinak an pek i tutan ah 31st Prime Minister of Australia dirhmun a hung kai hi a si.

Rampi thimnak ah bual a co bak in tuah colh a timh mi hna tampi lak ah thil biapi an ti mi cu.

  1. EVs (Electric Vehicles) a ser lai i a tunnak hmun (national EV charging network) a tuahchih lai.2. Medicare Urgent Care Clinic 50 a ser lai.3. Zawtfah thlopbulnak man a thumh lai.4. National Broadband Network (NBN) cak deuh mi a ser lai.5. Nihlawh a sanh lai6. Lam le sul a thanchoter lai.7. Nuhrin sinak kar dannak hruang a chah lai (closing gender gap).8. Ngakchia zohkhenhnak (chilcare) man a thumh lai.9. Rian cawnnak (TAFE) le sianghleiruun ca ah tampi chap a timh.10. Tar zohkhenhnak (Age Care) zohkhenhnak a remh lai.
  2. Ziknawh Eihmuarnak dohtu phu (National Anti-corruption) a ser lai.12. Pulrai phun siloah tihnung zawtnak in i ven khawh nakding ah Centers for Disease Control and Prevention (CDC) a dirh lai. 13. Vawleipi nih ai buaipi mi Climate Change kong ah luhlinh in rian a tuan lai. 14. Tax a thumh lai.15. Inn le lo cawk fawi deuh nakding ai zuam lai.

Hi hna pin ah thil dang tampi hmuitinh a ngeih mi an um. Thimfung a kawl lio ah, Thlen nan duh thimfung ka pe u a ti i teinak a hmuh hnu biachimnak zong ah thlen ding le siamremh ding in thimfung nan ka pek bantukin hmunkhatte ah tang in kan ram kan sersiam ti hna lai, a ti. Laimi cheukhat nih Labor Party kan remlonak hna cu, Ralzaam kong le ngeihkhat thitum (same-sex marriage) ruangah a si. Taktak ah cun Lai/Chinmi Australia ai khumh buaktlak in tuak tikah Labor kutneh a tam tuk.

Rammi sinak (citizenship) kong zong ah Labor nih cozah a tlaih lio ah Chinmi tampi nih an rak hmuh ti si. Ralzaam kong zong hi kan ram sining hoih in lak a si tawn tikah, anmah Labor nih cozah a tlaih lio ah cun papek kan rak si, sinain Liberal cozah a kai hnu kum zeimawzat hnu ah papek sinak in a kan thlak i 4/5 ah a kan chiah. Cucaah Labor cozah nih ruah ning bantukin mi a deuh lo kho men.

Biadangpi ah.Teinak hmutu Prime Minister Anthony Albanese cu tei lawmhnak zanriah hmanh dum manh dawh a si loh! Ram li (Japan, Australia, India le USA) komh in dirh mi Quad tonbiaruahnak (meeting) tuahnak Japan ah phawhnih in choi colh a hau. Cucaah riantuanti ding ah ai thim mi Penny Wong (Foreign Minister), Richard Donald Marles (Deputy Prime Minister) le James Edward Chalmers (Treasurer) he ti’in cawnnikhatni ah biakamnak ngeih ding timhlamh an si ti si.

Mino hna.Tutan Australia thimnak nih a kan cawnpiak mi cu, nuhmei farah chungkhar in a thanglian mi, kingro ngaktah sinak in a thanglian mi, dawt kuang khat lak in a tingco lo mi, ruun-rep ngei lo chungkhar si ko zong ah, mah le mah sinak i lungsipinak (self-esteemed) hmang in tumtah nganpi he hmai kal ahcun, chunmang a tling kho ko tihi a si. Cucaah zei bantuk chungkhar in a thanglian mi na si zong ah, nuhmei ngaktah fa na si zong ah, lungthul loin na zuam peng a si ahcun, nikhat khat ah n akum a vui ve te ko lai.