Relcio Uh Khah Mindat Pasaltha Hna Nihmipi Sin Ah Thawng Thanh Nak An Tuah

Dothlennak tuah hnu kum 1 chung ah CDF Mindat ralkap 46 nunnak liam.Hriam tlaih in Myanmar ram uknak hramhram in a latu Min Aung Hlaing dohnak kum khat chung ah thlanglei Laitlang CDF Mindat chung in CDF ralkap minung 46 nih ram le miphun ca ah nunnak an pek tiah CDF Mindat Lutlai Salai Mang Om sin in kan theih.

Nunnak a liam mi hna hi 2022 kum chung ah minung panga le 2021 kum chung ah minung 41 an si i hi chung ah 2021 May 5 lawng ah minung 5 nih nunnak an pek tiah theih a si.

Salai Mang Om nih, Kum khat chung ah nunnak a liammi ralkap ram pasal tha hna cazin kan tuah buin a sang bik upatnak kan pek hna. Zumh awktlak in nan zulh mi lam cung ah a taangmi nan hawile nih teinak hmuh ding in kan rak doh zungzal lai, tiah a chim chap.

THAWNG DANG, Sagaing ramṭhen, Kalay pengkomh, Kalay peng ah hrambunh a simi PDF-Kalay battalion 4 sakhaan cu May 14 ah SAC ralkap nih vanlawng 3, MI 35 helicopter 2, drone pawl le kekal ralkap 200 hrawng he an doh hna caah sakhaan an lak tiah theih a si.

SAC nih vanlawng in kahdohnak a tuah hmasa hnu ah Infantry 89 in Captain Ya Za Myo, Major Than Naing le Infantry Zwe Thu Htun hna hruaimi SAC ralkap 200 hrawng nih an rak doh hna caah hriam le kuan aa tlukruan lo tuk caah sakhaan cu chuahtak a si tiah PDF-Kalay rianngeitu nih DVB a chim.

Vanlawng kahdohnak ruangah PDF-Kalay in hliamhma a tuarmi an um ko nain a thimi an um lo tiah theih a si. SAC ralkap pawl kan sakhaan an phan i sakhaan le sakhaan chung thilrii pawl an hrawh dih” tiah PDF rianngeitu nih a chim. SAC kahdohnak ruangah Sheshin, Laykya, Kokul le Shaṭaw khua 6 in mipi 5,000 leng cu ram tangah an zaam dih tiah theih a si.

Kan zaamnak hmun pawl SAC nih van lawng in an kan kah. Vawlei lei zong in an kan doh. Kan zaam lengmang. Kan inn pawl cu an kan khanghpiak dih caah umnak hmun kan ngei lo, ram tangah buk kan i sakmi zong an kan khanghpiak chih” tiah a zaammi pakhat nih DVB ah a chim. Ralzaam 5,000 leng cu eidin an har tuk caah bawmhnak an herh ko tiah theih a si.

Matupi peng ralzaam pawl eidin le sii-aii an chanbau; Chin ramkulh, Matupi peng Aidat camp ah a ummi ralzaam hna nih eidin le sii-ai an i zat lo ruangah harnak an tong i bawmhchannak an herh tiah ralzaam bawmtu pakhat nih Khonumthung Burmese ah a chim.

An herhmi hi eidin, sii, sii lei a thiammi saya/mah pawl an herh. Cun, a biapi in ruahkhamnak, puan, a si khawh ahcun khiangthawng tiang fur caah an herh ko. A voikhatnak bik kahdohnak lioah a zaammi le a tu he ticun a hohmanh nih ram tangah an thilrii an phor kho ti lo.

SAC ralkap pawl nih an fir dih caah kan har taktak ko, tiah a chim. A luancia kum October thla thok in CDF-Matupi le SAC ralkap karlak kahdohnak ruangah Mindat-Matupi lamcung khuami vialte ke Aidat tlang mipi hna ram tangah an zaam dih hi a si.

Ralzaam hna cu sii-aii chanbau ruangah kum 8 hngakchia pakhat telh in mipi 6 an nunnak a liam i a tulio caan hi ralzaam pawl umṭhutnak le eidin lei harnak an ton bik caan a si tiah ralzaam bawmtu pakhat nih a chim. Ralzaam hna caah eidin a tlamtling hrimhrim lo.

Funding zong a um lo caah bawmchanh khawh an si lo. Pakhat le pakhat ngeihchun te i hrawm in eidin a si. Tuzarh chung ca an eidin hi a um kho men asinain, a raa laimi zarh ca ruahdamh khawh a si bak lo tiah a chim.

SAC nih thlanglei Laitlang ah thazang tampi in kahdohnak a tuah hi a voithumnak a si cang i SAC ralkap pawl nih an ratnak lamthluan chung a ummi inn pawl cu an hrawh dih caah ralzaam hna kirnak an i harh tiah theih a si. Matupi peng ah ralzaam camp hmunhma 4 a um i Aidat ralzaam camp chung in ralzaam 1,370 hrawng an um tiah Khonmthung Burmese nih a langhter.