Rev. Tluang Hre; “Ram Hrinfa Dihlak Ram Caah Țuanvo Kan Ngei”

“Ram Hrinfa Dihlak Ram Caah Țuanvo Kan Ngei”
===============
Minung poh hi vancungin a tlami kan um lo i nu hrinfa, ram hrinfa chuahkehnak khua le ram a ngeimi lawng te kan si. Ram hrinfa kan si dih bantuk in ram chiat/țhatnak caah țuanvo kan ngei dih. Kan khua/ram a chiat/țhatnak cu ram hrinfa kanmah cungah aa hngat. Minung pakhat cio hi ram le miphun he kan i pehtlai dih. Mi cheukhat nih cozah phaisa cu fir zongah a poi lo tiah kan ti tawn, a taktak ahcun cozah cu kanmah cio kan si ko. Kanmah vialte kan i funmi in cozah a chuak i kan thawhmi ngunkhuai in cozah nih rian a țuan … cu caah cozah a hram cu ram hrinfa kanmah dihlak kan siko.

2021 February 1 thawk in Union of Myanmar rampi cu mahzawn lawng aa ruatmi rallokap hna nih nawlngeihnak an lak caah ram chungah buaibainak a chuak i khuaci kan mui. Generation Z hna nih lamzawh tlangau in dohdalnak an tuah, cozah riantlai hna nih rallokap rianțuan kholo dingin CDM tuahnak in dohdalnak an tuah, cuhnu ah mino hna nih CDF, CNDF ser in CNF/A he ram zalennak caah dothlennak rian ah țuanți a si.

Union of myanmar cu dothlennak a tuah cuahmah liomi, ral a do cuahmahmi ram kan si. Ram hrin fadawt hna cu inn le lo chuahtak in ram tangah fikfa lak le cangvet lak ah, runrep-lo deubuuk tangah miphun zalennak caah tiin an pum an i pe i khua an sa hna. University kai liomi fanu/padawt hna cu sianghnuai meithal tlaih in ral ram ah an kal, an duhthimnak ruangah a si maw ti ahcun … a si lo, ram hrinfa an sinak i an țuanvo an i fian caah a si.

Minung ahopoh nunnak pakhat lawng a ngeimi, vawlei ah chankhat te lawng a nung ding kan si dih. Ram caah thihngamh in ral doh awk ah ral ram a kalmi hna hi nunnak pahnih an ngei hlei lo, an ngeihchun nunnak pakhat tekha ram caah an sian i an thaap. Ram țhatnak caah ram hrinfa dihlak țuanvo kan ngei dih, ngakțah nuhmei in mirum milian kan dihlak kan kanmahle kan tikhawhnak lam cio in i tel dih ding kan țuanvo a si. A huamzaangmi le a lawngkaangmi lawng nih raldoh ithawh a si lo, chungkhar cio kan i tel dih ding kan țuanvo a si. A tutan dothlennak ah nangmah le na chungkharnan i tel lo ahcun ram hrinfa na sinak in na mui a pil lai… i ruat ko.

Ramleng khuasa ramhrin fadawt hna, ram hlum um hna cu “Ral le Rai” nih a kan den i thihri nunri ah kan um lio caan a si. Puanlu khuh in kan țah lio caan a si. Kan khua cia le kan innchung cia ah hnangam lo in le thinphang thlahai in kan um lio caan a si. Thih le nun karlak ah ram dawtu pa/nusal hna nih ral an doh cuahmah lio caan a si…. hi lio caan ah nang khoika ahdah na um, zeidah na tuah, zeidah na eidin tawn kha?? Sining i hrawm caan a si fawh hih.

Ral ruangah siseh, rai ruangah siseh a paammi hna i țah rih hlah uhsih, kan mithli thla rih hlah uhsih, kamseh hacang rial in le biartung i let in kan dothlennak a dongh tiang teinak kan hmuh hlan lo hmai kan nawr hna lai tiah biakamnak he kaar kan hlaan lio caan a si. Vawlei cung ramțha ramrum timi poh a rum cia a țha cia an um lo, ram chung minung hna nih dothlennak an rak tuah i thisen le nunnak tampi an liam hnu ah ramnuam ramțha ah an ser. Kan nih zong kan ram kan sersiam lio caan a si.

Tuanbia kan țial cuahmah, hodah a keneh aa dawh in ram a daw taktak timi a hun i fiang thluahmah. Uknak chiathrut lio ah dinnak a țanh i midang zawn a ruattu hna cu nihin an tuahsernak le an țialmi tuanbia nih cungah a cawi te hna lai. Kan tonmi harnak buaibainak hna hi kan miphun i funtomnak le kan țhawnnak ah hmanthiam khawh kan i zuam hna lai, caan chia kha caanțha ah Pathian he thlenkhawh kan i zuam hna lai.

Ramhrin fadawt dihlak lungrual tein rallokap dohnak caah siseh, puul rai dohnak caah siseh kanmahle kan sikhawhnak lam cio in țangți hna uhsih tiah kan sawm hna… CDMers pawl ram nan dawt ruangah har nan tuarnak le nan i pekchanhnak kan in theihpi hna upatnak kan in pek hna, nangmah naa peknak ruangah teinak a ra lio, na biapi tuk, vun kan hngekpiak rih ko sawh. Ram le miphun sersiamnak caah tlangautu, țuanreltu, thawhvo a thawhtu le Zingnu Pathian sin ah thlaza a camtu nan dihlak cungah kan i lawm, lungțul lo tein hmai kan nawr ți hna lai… kan dihlak te kan țanți ahcun kan tei hrimhrim lai.

Ram țhatnak caah Ram hrinfa dihlak țuanvo kan ngei. Ram hrinfa poh ram nih an herh, an hlam…“Kan dihlak kan i rualkho hna lai maw, Asilo ah hri thlainak țheng cungah pakhat hnu pakhat dah kan kai lai…“Gentleman, we must now hang together or we shall surely all hang seperately”. “ကျွန်တော်တို့အားလုံး လက်တွဲကြမလား ဒါမှမဟုတ် ကြိုးစင်ပေါ်တဦးစီတက်ကြမလား ဆုံးဖြတ်ကြပါ” Benjamin Franklin, Credit: Rev. Tluang Hre

Be the first to comment

Leave a Reply

Your email address will not be published.


*