RIP; Zahan zantim ah Mandalay ah ralhrang nih sualnak a ngei lo mi khuami pa 4 an thah hna

Zahan zantim ah Mandalay ah ralhrang nih sualnak a ngei lo mi khuami pa 4 an thah hna
======================

Mandalay remthen, Nwathogyi peng, Lye Pyo khuakomh, Lye Pyo ( Aley khua) ah ralhrang nih hriamngan in an kah hna caah khuami mipi minung 4 an i hliam , minung 4 an nunnak liam inn 3 a rawk tiah khuami hna nih an chim. Lye Pyo sianginn ah ralhrang minung 50 hrawng cu umhmun an khuar i September 20 zaan Suimilam 12:00 ah an um hmun in mipi umnak inn lei cu an rak kah caah khuami 4 cu an inn cia ah an nunnak liam colh.

“Ralhrang hna nih cun i tinh ciammam ten an kah. Hriamngan thawng cu voi 8 kan theih. Meithal in cun tamtuk an kah. A thi mi 4 an ruak cu an lak hma i khoikaa an kal pi kan thei lo. Ahliam mi hna cu Mandalay sizung ah an chiah hna.A thi mi hna inn cu ralhrawng 5 hrawng nih security an lak. Lye Pyo khua ah ralhrang nih a ruang um lo in an kah hna ruangah September 11 ni zong ah Saikel a cit mi mipi 1 a thi i pakhat a hliam tiah an chim.

Mah bantuk i kahnak ruang ah Lye Pyo khuami le khuapawng mi hna cu tihphan in khua an sa. Nawlngeihnak la tu ralhrang phu hna nih rallokap mithar khawmhsuat dingah harnak a um caah, rallokap rian a tuan bal mi, mihlun chungin riantuan kho than tu ding hna cu checkhlat in ramkulh le ramthen cio in rianlut than kho tu ding hna cu a thli in sawm an si than tiah, rallokap hlun chungtel hna sin in theih a si.

A hlei in kutkiak, kee kiah ruang ah a din mi hna tel lo in le mithah lainawn ruangah rianchuah a tongmi hna telh lo in, zeidang ruangah rian a din mi le a ngol mi, riantuan tu hlun hna cu hmunkip cio ah checkhlat ding in ramkulh ralhrang bawi nih nawl pek a si tiah Mon ramkulh rallokap riantuan hlun pakhat nih a chim.

” Kanmah sinah rallokap riantuan hlun phu hna chung in riantlai than kho ding cazin an lak, a hlei in ralhrang phu nih a herh tiah a auh tik caan poah ah riantuan kho tu ding 13(d) in a chuak mi hna, kum zeizah an si le tlamtling in checknak an tuah, cun a dang zong in kum upa zongah ngandam mi a si ahcun khuachung security tibantuk ah hngahter ding in ” tiah Ayarwady times ah a chim.

Atu lio ah ralhrang phu hna nih ramkulh le ramthen hmunkip ah rallokap riantuan hlun simi hna sinah biaruahnak le bawmhchanhnak pehtlai in an tuah. Cun pyusawthi phu chungin ralhrang riantuan hlun zong an um, hmunkip cio in pyusawthi phu chungtel in ralhrang rianngol cang mi, mihlun minung 20 cu hriam pek an si cang tiah pyusawthi phu in minung pakhat nih a luancia ah thawngthanhnak an tuah. Asinain nawlngeihnak la tu ralhrang phu hna nih pyusawthi phu dirhnak a um lo, cun hriam pek zong an si lo tiah a chim than. Crd; The Chin Post

Be the first to comment

Leave a Reply

Your email address will not be published.