SAC Ralkap Nih Kum 13 Ngakchia Telh In Tualchung Mi 22 An An Tlaih Hna

Karen ramkulh, Bilin peng khuate ah kum tling lo ngakchia telh in tualchung mi hna cu an thil phorhter ding le ralphaw hman dingin SAC ralkap nih an tlaih hna, tiah tualchung mi hna sin in theih a si. Tat Ma 44 kuttang nih Bilin peng khuate ah a luancia June 17 in July 1 tiang ngakchia kum13 pakhat telh in tualchung mi 22 cu an tlaih hna, tiah KNU nih nihin July 4 ah cathanh an chuah.

Cu pinah GawHe khua ah rallam an sial lioah ralphaw ah an hman hna. Ar 89, Meheh 4 le tangka kyats sing 34 leng man cinthlakmi zong an hrawh, tiah KNU nih an langhter. Bilin peng ah a lut mi hi SAC ralkap Tat Ma 44 kuttang Battalion 3 an um i, KNLA, KNDO he voi 8 kahdohnak a chuah hnu in SAC ralkap nih hriamngan in an kah caah inn 8 a rawk dih, tiah theih a si.

Cun Karen ramkulh, Myawaddy peng thlanglei, UKaRitHta camp ah WawLay Brigade in hriamnam a chantu SAC ralkap pawl cu KNLA, KNDO nih an kah hna caah SAC ralkap 20 leng an thi. An hruaitu Major Htin Lin Aung cu a zam hmasa, tiah a zam vemi sergeant Phung Hein nih a chim. Kha Ma Yah 3 in ralkap 56 kan si i, a kan hruaitu cu Major Htin Lin Aung a si. An kan kah i a thimi an tam. A kan hruaitu Hyin Lin Aung cu a zam hmasa, tiah a chimchap.

KNLA le KNDO nih Tat Ma 44, Kha Ma Yah 3 in SAC ralkap 56 le ralbawi Captain pakhat telh in ralkap 66 nih rallam sialmi cu an kah hna caah 20 hrawng an thi. Sergeant pa zong a keng ah bomb nih a khen i a zamnak ah KNLA ṭangṭi phu hna nih an tlaih, tiah Cobra phu in Bo DaBaw nih a chim. SAC ralkap pawl cu UKaRitHta camp ummi hna caah zenkuan va chanh dingin ralkap 80 nih Helicopter 4 in an kal, tiah theih a si. UKaRitHta kahdohnak ah SAC ralkap a thimi an tam caah vanlawng in an kah hna. KNLA၊ KNDO lei zong in 30 hrawng an nunnak liam cang , tiah theih a si. Credit: The Chin Post