Saya Herh Lian Chungkhar Sinin Lunglawmhnak Bia

Saya Herh Lian Chungkhar Sinin Lunglawmhnak Bia
============
Pa Herh le a chungkhar kan cungah dawtnak, zawnruahnak, zaangfahnak he a kan dirkamhtu nan dihlak cungah lunglawmhnak chim lo in kan um kho lo. A hmasabik ah kan nunnak a ngeitu le a kan daw zungzal tu “Thihnak Teitu Minthang Khamhbawi” kan Pathian a min thiang ka thangthat.

Cung Cung pa kan conghhramh chung vialte le mual a kan liamtaaknak in ruak kan i hunh chung vialte le thlan a tlak tiang a kan dawtu hna: Kan Khrihfabu LBC kan Pastor te le Mino vialte nih chunzaan in thih-nun ruat loin Oxygen nan kan khanpiak, khuaza tungpang nan hriat i a si kho ti lomi chung tiang zong in chambaulo tein nan kan dirkamh. Cun, kan thih zaan in thlan kan tlak tiang catbaang lo tein nan kan umpi, nan kan hnemh, thazaang nan kan pek, thla nan kan campiak Lunglawmhnak chimcawklo kan ngei.

Cun, khaulin lak le tihphannak tampi lak zongah mah nunnak hmanh ruat loin Oxygen a kan khanpiaktu Saya Thawng Tha Thang le a mino nan dihlak cungah le Lai Chiatthat Bu nan cungah chimcawklo lunglawmhnak kan ngei. Kan zawt chungah dawtnak le zawnruahnak dihlak he ti le rawl le ei-din phunphun a kan cawkpiak i a kan chantu chungkhar le pumpak nan dihlak cungah kan i lawm ti leng cun chim ding kan ngei ti lo.

Dawtnak le siaherhnak he phone a kan chawntu, message in thazaang a kan petu, le thla a kan campiaktu nan dihlak cungah lunglawmhnak chimcawklo kan ngei. Sii le ai le vitamin lei le fimthiamnak lei in a kan zohkhenh i a kan bawmchantu Dr. Za Za cungah lawmhnak chimchawklo kan ngei. Ramchung ramleng in kan zawt chungah siseh, thihnak kan ton ri in nihin ni tiang kut a samh i chaw le va he a kan tanpi tu dawtu nan dihlak cungah kan i lawm hringhran. Cham awk a tha ti loin nan kan dawtnak vialte Bawipa nih kan theihpiak dih ko seh.

Min chim tein vun laughter ka duh ko: sii-ai le vitaminlei ah ruahnak a kan petu Pu Joel Ling te chungkhar cungah siseh, Solomon pa te chungkhar cungah siseh, Sayamah Khin Khin cungah siseh, oxygen le pangpar a ka cahpiaktu Pi Esther cungah siseh, a lam kip in kan zawn a kan ruat i a kan dirpitu min kan langhter khawh lo mi dawtu nan dihlak cungah lunglawmhnak chimcawklo kan ngei.

Kan Kawlram chung um Lai Mino thawk in vawlei cung ramkip in amah Pa Herh philhlonak le ngaihchiatpinak nan langhtermi vialte nih thazaang a kan pek i a kan hnemh fawn. Nan dihlak cungah lunglawmhnak chimcawklo kan ngei.
Lamhlat lamnai, ramchung ramleng in bul a kan petu le a kan kuatu nan dihlak lak cungah lawmhnak chimcawklo kan ngei. Min chim in kan langhter khawh dih lai lo caah nan ka ruahthiamnak lai zong kan nawl fawn hna.

Cun, a thaw hmanungbik ah Cung Cung Pa nunnak amah Bawipa kut ah a ap i thla a campiaktu Rev. Sang Hre cung zongah lunglawmhnak tampi kan ngei. Hihnu hmailei zongah kan biakmi kan Pathian le dawtu khrihfabu le pumpak cio nanmah nan um caah kan hna a ngam i Cung Cung Pa nih kan kaltak ko hmanhsehlaw hmualpho in kan um hrimhrim lai lo ti zong fiang tein ka hngalh caah ka lawm. Nan dihlak Bawipa nih thluachuah in pe cio hna seh! Aa Mi le a fale

Be the first to comment

Leave a Reply

Your email address will not be published.


*