Thantlang Kahdohnak Ah Mipi Vengtu Pasaltha Hna Anzam Nak Kong Lam Cu

Khuachung kahdohnak kan tuah, tiah Statement chuah hrim lo ding. A ruang cu Ramkip nih atu lio kan ram buaibainak ah a ho dah a palh hmasa timi zoh liomi kan si. Cu caah khuachung kah dohnak kan tuah hmanh ah Ralhrang nih sualnak an tuah hmasa tiin Statement chuah ding. Tahchunhnak ah

Thantlang ah kahdohnak kan tuah timi nak in Thantlang khua ah Ralhrang nih khangh rih lo mi Mipi Inn a vengtu kan ralkap cu Ralhrang nih an kah hna caah khuachung kahdohnak a chuak, tbk in Statement chuah deuh ding. KNU/KNLA hmunhma in Ralhrang chuak dih uh timi KNU nih cathanh a chuah tik ah Kan mah hmunhma a si ti loin Ralhrang hna nan um ruang ah Mipi Rian ttuan ngam lo le thinphang in an um titu in cathanh an chuah.

Hihi zei ruang ah dah a biapit ti ah cun a hlan ah Thantlang khuachung kahdohnak a um tik ah International media nih case bak in an lakmi cu khuachung kahdohnak a ho nih dah a thawk hmasa ti hi a si. Cu caah kan Statement ah Khuachung kahdohnak kan tuah tiah kan langhter ah cu khuangchung ah Inn le lo a rawkmi hi kan mah palh ruang ah a si tiin International media nih cun an lak khawhmi a si.

Cu caah Hriamtlai bu a cak bik ah aa telmi AA, KIA, KNU tbk hna nih kahdohnak kong cathanh an chuah ah khin Sakhaan lak kahdohnak a si hmanh ah Ralhrang sualnak kha biapi in an langhter hmasa i hrial awk a tthat lo caah kan doh hna tbk in an cathanh khi an ttial lengmang. Cu caah a rauh hlan ah khuachung Chinram khuapi kip kahdohnak a chuak kho, a chuah tik zong ah Cathanh ttial i ralring hram usih.Crd: Salai Dohkhar

Thawngdang relchih te law, Palh chap than ti lo a biapi! Tutan kan ram dothlennak cu kanmah chan ah a voi khatnak kan tonmi a si. Cu tikah, ka tuanmi rian hi a sen maw a nak hme ti hmanh kan thleidang thiam tawn lo. Miche cu dothlennak nih a chuahpimi reng sangsang hna kan van i khinh, kan liang cung cio a phak tikah zeitin kan phurh lai i zeitin hmailei ka kalpi lai ti hmanh kan thiam tawn lo.

Tuan/Cawn/Hmuh/Ton– bal lomi rian lawngte a si tikah kan hmaika ah le Ningzah/Mualpho/Tisual/Chimsual– palhnak phunzakip nih a rak kan hngah peng ve! Minung cu ahopaoh aa palh pengmi le aa palh kho pengmi kan si hna—Jesuh dah ti lo. A luancia caan kan palhnak cu kan remh than kho ti hnga lo, nain palh chap than ti lo ding cu kan tuah khawh ciomi a si.

Cu ‘CHAP’ than ti lo nakhnga kan palhnak zong kan i theih i kan pom a hau ve. Palhnak a thei i aa pom ngammi cu remh than duhnak lungput a ngeimi le palh chap than ti lo ding a vengmi an si hna i mah cucu mizei paoh zong nih ngaithiam khawhmi a si.
Ka palh ko ti aa theimi nu zong cu Jesuh zong nih sual a rak phaw ve lo. Nain, a sual bel va sual ti hlah tiin a rak ti (John 8:7).PALH cu minung kan nunnak ah a phung si ko. PALH CHAP than lo tu kha a biapi. Zabawi Thawng