Thawng Fiang; August ni 15 chung ah KNLA nih ralhrang 34 reng lo a thah hna!

Thawng Fiang; August ni 15 chung ah KNLA nih ralhrang 34 reng lo a thah hna!
=========
Karen National Union (KNU) ralkapbu 5 um nak hmun Hpapun (ဖာပွန်) district ah August thla ni 1 in ni 15 chung ah ralhrangbu le Border Guard Froce (BGF) fonhti mi hna cu Karen National Liberation Army (KNLA) he ral voi 56 an i tu i ralhrangbu lei in ral bawi pa 1 telh chih in lurel 34 an thi i pa 15 hliamhma an pu. Karen National Liberation Army (KNLA) lei zong pa 3 hliamhma an pu ve tiah KNU hrihram thongpang sin in kan theih.

Karen National Union (KNU) ralkapbu 5 hmun chung ah ralhrangbu le BGF hna cu an ralkap thazang a kauhter thluahmah caah nifatin kahdoh nak a chuak i ralhrangbu lei nih khuami hna an um nak inn le an lo hna chung ah hriamnam ngan a kah hna raung ah khuami pa 1 a thi i pa 1 hlaimhma a rak pu.

Mindat Meng 15 kahdoh ank ah ralhrang bu nih khuami inn mei an khangh piak. August ni 15 ah CDF- Mindat le ralhrang bu hna kar ah a chuak mi Mindat-Matupi lam Meng 16 kahdohnak ah hliamhma a pi mi ralhrang bu nih Meng 15 lampi i a um mi khuami hna inn pa 2 cu mei in a khangh piak. Credit; khit Thit Media

Falam Peng Kahdohnak ah SAC Ralhrang 40 Hrawng an Thi. July 1 in August 15 karlak ah Falam peng chung ah CNDF, PDF-Kalay le CDF i bawm in SAC ralhrang he kahdohnak voi tam nawn a chuak i SAC ralhrang lei in 40 hrawng an thi lai, tiah CNDF nih an ruahdamh. July 1 ah CNDF le PDF-Kalay i bawm in SAC ralhrang he kahdohnak ah ralhrang 4 an thi.

July 21 in August 15 tiang ah Falam-Hakha karlak ah CNDF le CDF i bawm in SAC ralhrang he kahdohnak voi tam nawn a chuak i ralhrang lei in minung 35 hrawng an thi lai, tiah an zumh. SAC ralhrang 30 hrawng hliamhma an pu i, Falam-Hakha karlak ah SAC ralhrang Drone pakhat zong kahthlakpiak an si, tiah CNO nih cathanh an chuah.

Nizaan Mindat Kahdohnak ah SAC Ralhrang 10 Leng Thi. Nizaan (August 17) ah Mindat peng chung ah CDF-Mindat le SAC ralhrang karlak kahdohnak a chuak i, SAC ralhrang 10 leng an thi. CDF-Mindat chimnak nawlngei pakhat nih, “Nizaan cu meng 11 le meng 13 karlak ah kahdohnak a um. Meng 16 zawn in a rak kirmi SAC ralhrang pawl lampi ah kan kah hna.

SAC ralhrang lei in minung 10 leng an thi i, meithal 6 le kuan pawl kan lak khawh,” tiah Mizzima ah a chim. SAC ralhrang thazaang 350 nih Mindat khua nitlaklei le nichaklei in ralhriam ngan pawl nih CDF-Mindat an doh hna.

Nizaan i kahdohnak ah CDF-Mindat lei in minung pakhat hliam (fak lo) a pu. August 13 thawk in Mindat ah kahdohnak a fak tthan i khuami minung 4,000 hrawng ramlak ah an zaam tthan hna.

CDF-Mindat nih SAC Ralhrang Pakhat a Nung in an Tlaih, Ralhriam Cheukhat zong an Lak. August 13 in aa thawkmi Mindat-Matupi karlak kahdohnak ah CDF-Mindat nih SAC ralhrang pakhat a nung in an tlaih i, ralhraim cheukhat zong an lak, tiah CNF CEC chungtel upa pakhat nih a langhter.

CNF CEC chungtel upa Salai Bawi Lian Mang nih, “August 17 Mindat le Matupi kar CDF le Kawl ralhrang i kahnak ah Kawl ralhrang 20 an thi, a nung in pakhat an tlaih,” tiah a ttial. SAC ralhrang he aa kap cuahmahmi CDF-Mindat ca ah thlacampiak ding zong in halnak a tuah.

“Tutan an i kahnak hi ni 5 a si cang i hi ninga chung ah SAC ralhrang 50 hrawng an thi tiah thawng an vun thanh. Atu zong an i kah cuahmah rih caah fakpi in thlacampiak hna u sih tiah kan sawm hna. An vun langhtermi hi nizaan August 17 SAC ralhrang sin in an lak mi meithal pawl an si,” tiah a ttial.

SAC ralhrang nih Mindat-Matupi lamkam khuate kiangkap pawl ah mortar bomb in an kah zungzal caah khuami tampi nih an innlo an chuahtak i ruahsur le thlihran lak ah ramlak ah an zaam hna. CDF-Mindat pawl doh awk ah SAC ralhrang nih Magwe ramtthen chung in ralkap le ralhriam thazaang a chap zungzal caah aralaimi caan chung ah i kahdohnak a zual chinchin kho, tiah CDF-Mindat nih thawngthanhnak ah an langhter. Credit: The Chin Journal

Be the first to comment

Leave a Reply

Your email address will not be published.


*