Thawngtha Taktak: Vuangtu Ralkap Sakhan Cu Ralkap Nih An Kal Tak Cang

Vawngtu Ralkap nih an sakhan an chuah taak

Thantlang peng, Vawngtu khua ralhraang sakhan ralkap pawl cu nihin September 30 zinglei ah helicopter nih a rak laak hna i sakhan an chuah taak cang tiah theih a si.

Nizan, September 29 ah Vawngtu ralkap pawl nih anmah ei lio mi facang tun 20 khuami sin ah an zuar. Cun nihin ah chiti, pe, ngapih le a dangdang zong khuami sin ah an zuar hnu ah atu bantuk in sakhan an chuah taak tiah theih a si.

“Bogyi pa zong nih kan khua ah a hawipa kha Hakha in phone a chawnh i, ‘Sakhan leng ah facang tun 30 le chiti kan chiah. Mah kha khuami sifak deuh pawl rak phaw hna u law’ a ti. Cun amah Bogyi pa cycle kha a hawipa cu rak i lak te law tiah mitthli he phone a chawnh. Cucaah Vawngtu Sakhan cu an chuah taak cang,” tiah Hakha um Vawngtu khuami pakhat nih a chim.

Camp chung ah mine an kal taak mi an um ca ah luh sawhsawh lo ding in khuami a cah taak hna ti zong theih a si.

Vawngtu Ralkap Camp ah a um mi ralkap pawl cu CDF-Zophei nih, rammi sin ah nan i fonh lo ahcun kan in kah hna lai tiah ca an pek hna i, cu bantuk in ca an pek hna hnu ah atu bantuk in helicopter hmang in an rak lak hna hi a si tiah kan theih.

Hmanthlak ca: Vawngtu khua le Ralhraang cataar
Ref. The Hakha Post

Be the first to comment

Leave a Reply

Your email address will not be published.