Thawngtha Tuk; Tu Thla Chung ah Hakha ah Oxygen Sehzung an Tuah Cang Lai!

Tu Thla Chung ah Hakha ah Oxygen Sehzung an Tuah Cang Lai
———–
Hakha Township Public Healthcare (HTPH) tawlrelnak in August thla chung ah Hakha ah Oxygen sezung an tuah khawh cang lai, tiah thawng kan theih. Hakha Oxygen sehzung tuah nakding thilri cheukhat zong Yangon ah an phan chom cang i atu August thla thih lei cun tlamtling in seh bunh khawh a si lai, tiah HTPH Director Rev. Ni Cung Thang nih a chim.

“Khrihfabu kip i bawm in Oxygen Plant thilri cah a si i, Yangon ah a phan chommi thilri an um bang in atu thla ni 18 zong ah Yangon ah a phan ding thilri a um rih. Hakha lei ah rak phorh nakding a herhaimi zung lei catlap zong tlamtling in tuah dih a si cang. August 22, 23 hrawnghrang ah hin cun Hakha ah a phan lai i kan bunh khawh cang lai tiah kan zumh,” tiah a chim.

Hakha Oxygen sehzung a tuahtu ding company lei in Engineer pahnih an thlah hna lai i, Hakha ah a dang Engineer pahnih nih an bawmh hna lai. Hi Oxygen sehzung ca ah hin ting 3,600 MMK an hman i tlamtling in seh bunh khawh a si ahcun minute pakhat ah Oxygen 500L a chuah khawh lai.

“Oxygen sehzung hunnak hmunhma le seh nunter nakding ca ah a herhmi meiseh (generator) vialte cu Pu Thawng Kian te chungkhar nih an tawlrel dih caah kan tlam a tling cang. Pu Thawng Kian te chungkhar cung zong ah kan i lawm hringhran,” tiah Rev. Ni Cung Thang nih a chim.

Hakha ah COVID-19 in Minung 37 an Nunnak a Liam Cang. COVID-19 Third Wave nih Laitlang a kan phak hnu in Hakha khua ah COVID-19 zawtnak in minung 37 an nunnak a liam cang, tiah Hakha Township Public Healthcare (HTPH) ttuanvo ngeitu upa sin in thawng kan theih.

Hakha SAC nih an chuahmi mithi cazin le HTPH nih bawmhnak a pekmi mithi milu fonh in Hakha ah COVID-19 mithi zapi minung 37 an si, tiah HTPH Director Rev. Ni Cung Thang nih a chim. “SAC nih an chuahmi mithi cazin (mithi 17) le kanmah HTPH nih COVID-19 in an thi tiah bawmhnak kan pekmi hna he fonh ahcun COVID-19 Third Wave hnu in Hakha ah mithi minung 37 an si cang. Zawtnak dang in a thimi minung 19 zong an um,” tiah a chim.

HTPH le Hakha Rual-U tawlrelnak in COVID-19 in a thimi paoh cu Rual-U thlaan ah thlaan man 200,000 MMK in an vui hna. Ahlan ah thlaan man 300,000 MMK a rak si. Hakha Rual-U nih thlaan man 200,000 MMK tiang an tthumh bang in Hakha khuachung a dang thlaanhmun pawl zong nih thlaan man 200,000 MMK ah an tthumh cio cang hna, tiah Rev. Ni Cung Thang nih a chim chap. Credit; The Chin Journal

Be the first to comment

Leave a Reply

Your email address will not be published.