Thlahnih Chungah Ralhrang 1100 leng an thi tiah NUG Ministry Of Defence Nih An Langhter

Thlahnih Chungah Ralhrang 1100 leng an thi tiah NUG Ministry Of Defence Nih An Langhter
===========
Myanmar ramchung hmunkip ah thlahnih chungah a cangmi ramchung ral ah ralhrang 1200 leng an thi tiah NIG Ministry Of Defense nih an thanh. July thlachung ah a cangmi i kahdohnak ah ralhrang lei in 743 le June thla ah 387 an thi am dihlak ah 1130 an si.

Thlahnih chungah i thahnawnnam in ralhrang 153 an thi. Thlahnih chung ramchung ral ruangah mipi 358 an nunnak a liam i minung 139 hliam an tuar.Hi an thanhmi hi NUG Ministry Of Defence nih August 9 le 11 ah an thanh mi a si.

People’s Defence Force (Kalay) kahdohnak thawngthanh Nizan thokin Kalaymyo peng thlanglei Naatchuang khua chung ah rallokap an lut i chekhlat nak an tuah i Chin ramri ramri Pan Mon Chuang khua ah hmunhma la mi rallokap hna cu nihin zanlei sang ah ChuangKhuah,NaatChawngung lei ah i thial ding an kal pah ah PDF ( Kalay ) hna nih chunhnu suimilam 2:30 ah an kham hna i i kahnak a chuak.

Hi i kahnak ah zan suimilam 8:00 pm tiang i kah nak a um.I kahnak chungah kanmah PDF (Kalay) nih rallokap cu minung pathum kam thah hna i rallokap lei in hriamngan an hman caah PDF ( Kalay ) lei in minung pakhat a hliam.

Rallokap phu hna cu NaatChuang khua ah pehzulh in hmunhma an la ko rih caah i kahdohnak hi pehzulh in a um khawh rih caah Kalay le Gangaw kar mawtaw tlungkal cu mawtaw thlalangawng on bu te le khua mi mipi kilveng tu hna theih in ralring tein nan tlun kal nak lai thawng kan in thanh hna.

Ralhrangbu Nih Remdaihnak Ceih Ding Sawmmi Tlangcung Mi Nih An Cohlang lo. August 1 ralhrangbu nih nawlngeihnak a lak thla 6 tlinnak ni ah ralhrangbu hruaitu Min Aung Hlaing nih mipi sinah a biacah a chimnak ah ralhrangbu tiah kan thanhmi hriamtlaibu hna tello in zei bantuk hriamtlaibu hna he zong chawnhbiaknak ngeih kan duh tiah a chim.

Ralhrangbu nih uknak a lak hnu thla 6 tlinnak ah State Administration Council in Caretaker government ah min a thlen i, SAC chairman le ralhrangbu hruaitu Min Aung Hlaing nih a mah le a mah chief minister rian a khinh i, mipi sinah civil thuam he biacah a chimhnak ah atu bantukin a chim mi a si.

Hi kong he pehtlaihin KNU, KIO le tlangcung hramtlaibu cheukhat nih ramkhel kong ceihmaihnak cu hlonh awk a tha lo nain ralhrangbu cawlcang ning zoh ah remhdaihnak biaceihnak ngeih ding a si kho lo tiah an chim. Min Aung Hlaing nih ‘ramkhel buainak silhnalh nak ding caah ramchung kahdaihnak NCA hnatlaknak zong min thut a si cang.NCA hi tlangcung hriamtlaibu hna duhnak cungah ceih le minthut a si.

Kanmah nihcun NCA hnatlaknak cungah fek tein kan dir ko. Democracy le federal hrambunh mi rampi cu remhdaihnak he ser dingin chim ka duh. Ralhrangbu ah kan thanh mi hna ti lo ah zei tlangcung hriamtlaibu poh he i chawnh dingin kan sawm hna tiah a ti.

Hi kong he pehtlaihin KNU vice chairman P’do Saw Kwe Htoo Win nih tha tein dirhmun kan ngeih cia mi a si.Atu dirhmun ah chawhbiaknak ngeih cu a si kho lo.An duh poh in mi an thah hna.Chawnhbiaknak hrim hrim hi kan duh lo a si lo.Asinain atu ralhrangbu cawlcanghnak phun ahcun zeitin hmanh an sawmnak hi kan pom kho lo.Zumh zong kan zumh lo. An nawlngeihnak a feh khawhnak dingah a phun phun in an tuah mi a si tiah a chim.

Ralhrangbu nih uknak a lak hnu 6 chungah KNU le ralhrangbu kar ah Taw Le Tha le Ti Mu Tha sakhan kahnak he kahdohnak voi 700 leng a um tiah P’do Saw Taw Ni nih a chim.KNLA brigade 5 cazin ningah ralhrangbu 400 leng an thi i, KNLA 10 an nunnak a liam tiah theih a si.

KIO/KIA chimnak nawlngeitu Col. Naw Bu nih atu dirhmun ah ralhrangbu he i chawnh cu a si kho lo.Ralhrangbu nih an chim mi Federal, Democracy cu 2008 phunghrampi tang i federal lawng an chim peng.Tlangcung mi nihcun kan zum hna lo. Anmah lei thlennak hna an tuah hnu lawngah chawnhbiaknak zong a um kho te lai tiah ka ruah tiin a chim.

KIO chairman Gen. N’Ban La zong nih August ni 10 ah tuahmi Kachin Martar ni biacah ah anmah lawng phunpi ah a ruat mi, phuntanh ruahnak chia a ngei mi ralhrangbu hna cu a ci mit lakin doh dingin biachahnak kan ngei tiah a chim.

KIO/KIA hi NCA min a thut rih lo mi a si i, ralhrangbu nih uknak a lak hlan ah kahdaihnak tuah dingin cozah he a chawn peng mi an si nain, ralhrangbu nih nawlngeihnak a lak hnu in atu tiang hmun tampi ah a kap peng mi an si. Alaw Bum ralhrangbu sakhan an lak mi tel in kahdohnak 380 kan ngei A thi le hliam mi belte cu chim khawh a si lo tiah Col. Naw Bu nih a chim.

NCA minthu mi tlangcung hriamtlaibu 10 fonhmi PPST zong nih ‘ralhrangbu he chawnhbiaknak kan ngei rih lo tiah biachahnak kan rak ngei cang bantukin ralhrangbu he remhdaihnak kong siseh, ramkhel kong siseh ceih kan i timh rih lo tiah PPST hruaitu chungtel Col. Khun Okka nih a chim.

NCA min a thut rih lo mi Karenni National Progressive Party (KNPP) chungtuan Khun Deniel nih ‘ralhrangbu he i chawnh dingin ruahnak hrim kan ngei lo, Mipi thim mi cozah nih nawlngeihnak a ngah hlan chung cu chawn zong kan i chawn lai lo tiah a ti.

KNPP hi Karenni mipi ralkap KNDF he fonh in Karenni le Shan ram thlanglei ah ralhrangbu a do peng mi an si.Atu tiang ah ralhrangbu he voi 40 hrawng an i kap cang i, ralhrangbu 200 hrawng an thi, KNPP le KNDF lei ah bawi pakhat tel in 10 an nunnak a liam tiah Khun Deniel nih a chim.

NCA minthut hlan USDPcozah chan lio ah kahdaihnak kong ceih dingin cozah nih a pom mi tlangcung hriamtlaibu 18 an si i, mah chungah bu 10 hi NCA minthu a si i, min a thut rih lo mi hi bu 8 an si. Ralhrangbu nih tlangcung hriamtlaibu 18 he remdaihnak kong ceih pi a timh nain atu tiang cu zeihmanh thanconak a um rih lo tiah ralkap bawi hlun pawl he fonh mi strategic study group director Dr. Naing Shwe Oo nih a chim.

Hi kong he pehtlaih ramkhel kong catial U Than Soe Naing nih ralhrangbu nih an ral an tlawm deuhnak dingah tlangcung hriamtlaibu hna he chawnh a duh.Asinain ralhrangbu nih khuapi chung le khuate tiang mipi an thah, an tlaih, an hrem hna tikah mah dirhmun tangah chawnhbiaknak ngeih cu mipi zong nih an cohlan khawh lai ka zum lo tiah a ti.

Ralhrangbu nih rampi uknak a lak hnuah Kachin, Karen le Shan ram ah ni fatin i kahnak a um. NLD cozah chan lio ah kahdohnak a um bak lo nak Karenni, Chin ramkulh Magwe le Sagaing ramthen chung hmanh ah kahdohnak a tam ngai cang. Ralhrangbu nih nawlngeihnak a lak hnu kahdohnak ruangah ramchung hmunkip ah ralzaam sing 2 leng an um tiah RFA nih a langhter. Credit: The Chin Post

Be the first to comment

Leave a Reply

Your email address will not be published.


*