Nihin zinglei Hakha ah a tlami SAC ralhrang helicopter hmanthlak pawl cu SAC he aa pehtlaimi thawngzamhnak pawl nih an hun tarlangh.Ralhrang 2 le zung rianttuan 3 an i khawng tiah SAC chimnak nawlngei Zaw Min Tun nih a chim.
Kalay in Hakha ah Tang-10 caminpui Answer Paper a rak phormi a si i, kir than athawh ah hi ti bantuk in, athlak nak hi a si, tiah theih asi.
Thawnmg dang
Hakha he meng 36 a hlatnak hmun ah a ummi Tinam khua ah SAC ralhrang 100 hrawng zaan an riak i, inn 9 an khangh ta tiah ramlak ah a zaam vemi Tinam pastor nih The Chin Journal ah a chim.
“Ralkap 100 hrawng an si lai dah. Kan khua Baptist biakinn le Believer biakinn ah an riak i, inn an bauhmi le an firmi zong a um len ko. Lamtuk lei an lanh lai ah inn an khangh ta i inn 9 an ciam,” tiah a chim.
Inn a kaangmi hi bomb nih a tlakmi theng si loin an khangh hramhrammi a si ko, tiah a chim a chap.
“Bomb tlak ruang ah a kaangmi cu a si lai lo. Khuachung an um hnu, khua in an chuah lai ah a kaangmi a si i, an khangh hramhrammi si dawh a si ko,” tiah a chim.
Lamtuk khua pawng ah miphun ralkap le ralhrang karlak kahdohnak fak ngaiin a chuak i SAC ralhrang lei in a thimi le hliam a pumi an um len tiah kan theih nain mithi/hliampu a zat fiang in theih a si lo.
Tinam khua ah inn 105 a um i, an khua ning in milu 700 hrawng cu bu 6 hrawng ah an i tthen hna i ramlak ah an zaam dih hna.
SAC ralhrang pawl Lamtuk khua lei ah an kal caah Lamtuk khuami pawl zong nih an khua an chuahtak, tiah thawngpang kan theih.