Tutan cu Tial Cung Thang nih CNF thantar hrim hrim a hman a herh

Tutan cu Tial Cung Thang nih CNF thantar hrim hrim a hman a herh
=======================

Tial Cung Thang le Aung La Nsang hna cu Union of Myanmar aiawh in MMA a thongh mi an si. An i thongh i teinak an hmuh tik ah Union of Myanmar flag a hmang mi an si ti cu kan theih dih. Kan Union of Myanmar cu Min Aung Hliang nih avoi 3 nak ralkap uknak kuttang ah February ni 1, 2021 ah a kan uk than.

Aung La Nsang cu tu nai te July 30, 2021 ah a thongh i teinak a hmuh. A luancia mi caan ah Aung La NSang le Tial Cung Thang nih teinak a rak hmuh ah cun Myanmar thantar cu vawlei cung pumpi hmai ah langher nak a rak tuah tawn. Natein a tutan teinak a hmuh ah cun Myanmar Flag kha a hmang lo ti cu fiang tein kan rak hmuh cio. Aung La Nsang nih Myanmar thantar a hman ah cun ralkap uknak ka duh ti he a suallam a khat mi a si. Cu caah a rak hmang lo.

Biaktak ti ah cun Aung La Nsang hi kachin miphun a si caah Kachin miphun/ram thantar hi a hman ding a si. Ka chim duh mi cu kachin ramkulh thantar hi a si lo. Kachin Independence Army(KIA/KIO) thantar hi kachin miphun thantar cu a si i a rak hman awk bak a si. Natein Aung La Nsang nih cu a rak hmang lo, Miphun thantar um lo in teinak hmuh hi a sual lam a um lo.

Tial Cung Thang hi tutan August thla, ni 27 a thongh nak ah cun Kan Chin miphun thantar hi vawlei cung pumpi theih hngalh dih ding in langhter seh law a tha lai. Kan Chin ramkulh thantar hi Chin miphun kan sinak thantar a si lo. Chin National Front thantar hi kan Chin miphun (Chin National) thantar a si. Tial Cung Thang nih Chinram le Chin miphun thantar hi a aiawh ding bak a si.

Cu caah CNF thantar a hman a si ah cun Tial Chung Thang nih hmai lei ah Federal ram a si ding mi Chinram ka dirpi a ti duh nak a si. Federal ram si ding mi mah le ram, holh, biaknak thantar cu federal ram si nak kan hmuh hlan ah vawlei cung pi nih Kan Chinram flag cu a thladem in an hmuh ti nak a si cang lai. Aung La Nsang bantuk in a mah miphun thantar hman lo in a um sual ah cun a poi tak tak mi a si.

Note. CNF Thantar salute pek in Chin mino tampi Chinram caah an nun nak a pe mi an tam tuk cang. Tu CNA/CDF hna zong hi CNF thantar tang ah training a kai mi le dohthlennak a tuah mi lawng te kan si dih. Nang tah Tial Cung Thang nih kan Chin ram/miphun kan sinak a langhter tu CNF thantar hi hmang seh ti na duh ve lo maw? Na duh ah cun a hman nak hnga forhfial a hau.
Salai, Johnson C.Thabawi

Be the first to comment

Leave a Reply

Your email address will not be published.


*