UN Nih Ni Hin Sandah Piak Mi Hna Lakah Police Nih Hriamnam An Hman Ruangah Ca Thanh A Chuah Cang.

Nihin ralkap uknak lakmi duhlonak langhtertu hna cungah security palik nih hriamnam an hmanmi cu kan cohlan lo tiah UN nih Myanmar ah a rak thlahmi (UN Resident and Humanitarian Coordinator for Myanmar) nih a chim. Kawlram pumpi ah a cang cuahmahmi sandahpiahnak ah Naypyidaw.

Mandalay le khuapi dangdang hna i thil a cangmi thawngpang theih ning ah sandahpiahtu mi tampi cu security palik hna ruangah hliamhma a tuarmi an um len i cheukhat cu thinphang dirhmun tiang in an hliamhma a zual tiah Yangon hrambunh UN zung in an phuan.

UN nih Kawlram ah a rak thlahmi UN palai Mr. Ola Almgren (UN Resident and Humanitarian Coordinator for Myanmar) nih “Security palik hna nih dai tein ipumhnak nawl le zalawn tein chimphuannak nawl/covo pawl telh in mipi zalawnnak le an covo upat piak ding in kan nawl hna. Sandahpiahtu hna cungah thazaang hriamnam nan hmang mi ka cohlan kho lo” tiah a chim.

UN Secretary General nih a chimhmi, Kawl ralkap hruaitu hna nih ram mipi duhnak upat piak ding le a tlingmi Democracy phung upat in zulh ding le ruahnak aa khat lomi hna kha dai tein tonbiaruah, ceihtinak tuah in a phi kawl ding an forhfial hna tiah Mr. Almgren nih a chim chih.

Nihin Kawlram pumpi ah ralkap uknak lakmi duhlonak langhternak (sandahpiahnak) pehzulh in tuah a si i, Naypyidaw ah dai tein duhlonak langhtertu pakhat cu palik nih meithal in an kap caah a tlawmbik minung 20 leng hliamhma an tuar tiah theih a si. Kum 19 minu Mah Thet Thet Khaing zong palik kut in nihin ah a thi.

Ref: DVB

Be the first to comment

Leave a Reply

Your email address will not be published.


*