US ah U Kyaw Moe Tun Thah ding in Hlanmi Minung 2 Taza an Cuai Hna

US ah U Kyaw Moe Tun Thah ding in Hlanmi Minung 2 Taza an Cuai Hna
————
“U Kyaw Moe Tun nih aa citmi motor lehter hnu ah fahnak pek i tlerhkhawn (asiloah) thah ding in timhtuahnak an ngei.” US ram, New York khua ah U Kyaw Moe Tun thah ding in an hlanmi hna Myanmar rammi pahnih cu August 5 ah FBI nih an tlaih hna i Westchester biaceih zung ah taza an cuai hna, tiah The Washington Post nih a ttial.

U Kyaw Moe Tun thah ding in (asiloah) fahnak pek ding in an hlanmi hna minung pahnih cu Phyo Hein Htut (kum 28) le Ye Hein Zaw (kum 20) an si, tiah Westchester biaceih zung ah chuahpimi record ning in theih a si. Westchester biaceih zung i record ning ah “Phyo Hein Htut le Ye Hein Zaw nih UN palai (U Kywa Moe Tun) aa citmi motor a kee (tier) hrawhpiak i a motor lehter. Cu dih cun UN palai rian in chuak tiah tlerhkhawh/fahnak pek (asiloah) thah ding in timhtuahnak an ngei,” tiah a langhter.

A cunglei Myanmar rammi pahnih hi Thailand ah a ummi Myanmar ralkap ralhriam a cawkpiaktu (ralhriam puaisa) pa nih July thla ah a rak pehtlaih hna. Cu pa nih cun Phyo Hein Htut cu a pehtlaih i U Kyaw Moe Tun thah ding (asiloah) fahnak pek ding in $5,000 in a hlan.

Zella timi Application hmang in Thailand ah a ummi pa nih Phyo Hein Htut cu $4,000 voi hnih in a kuat. “A taangmi $1,000 hi rian aa lim in kan kuat te lai a ka ti,” tiah Phyo Hein Htut nih FBI sin ah a chim. Phyo Hein Htut le Ye Hein Zaw cu kum 5 tiang thongthlak khawhnak pohma in Westchester biaceih zung ah tazacuai an si.

Myanmar ram aiawhtu UN palai U Kyaw Moe Tun nih, “Atu bantuk in ka nunhimnak ca ah dinh caan ngei loin a cawlcaangmi US cozah, Ambassador Linda hruaimi USUN le security bu chungtel vialte cung ah lunglawmhnak tampi ka ngei,” tiah Twitter ah a ttial.

FBI Acting Assistant Director Jacqueline Maguire nih, “Kan ram ah a cangmi thil kong ah US upadi nih zei bantuk miphun paoh a huap dih hna. Cucaah, hi hna pahnih nih an tuahmi thil kong ah kan ram upadi ning in an zun ve lai,” tiah a chim.

Myanmar UN Palai U Kyaw Moe Htun thah timhtu Phyo Hein Htut le Ye Hein Zaw FBI nih an tlaih hna nak kong. NUG cozah UN ai awhtu U Kyaw Moe Htun cu US ram New York ah Min Aung Hlaing ralhrang a mifial hna nih U Kyaw Moe Htun thah dingin timhtuahnak a ngeih cuahmahmi Myanmar rammi (2) cu US ram dohhletnak ah nawlngeihnak sangbik a ngeih mi (FBI) nih an tlaih hna.

Ye Hein Zaw le Pyou Hein Htut hna nih Myanmar UN Palai U Kyaw Moe Htun cu US ram New York khuapi chungah thahdingin hnatlak nak an ngeih hnu ah Thailand ram thlithup hriamnam zuartu pa he pehtlaihnak an rak ngeih hmasa. Cu Thailand Thlithup hriam zuartu pa nih cun U Kyaw Moe Htun thahnak ah thil a herhmi cawknak le timhlamhnak caah US$ 4000 a rak kuat hmasa hna.

U Kyaw Moe Htun thahtu hna nih an rian an ilim le cang Kaa in US $:10000 pekchap rih dingin hna thlaknak an rak ngeih tiah US ram nawlngeihtu hna nih thawngthanhnak an tuah. Hi Kyaw Moe Htun thahtu dingin rian an fialmi hna US ram an rak kalnak Vanlwng ticket zawnghi Thailand ram ah a um mi Thlithup hriamzuartu pa nih a cawk piak hna tiah US thawng fianternakah an langhter chih.

New York khuapi White plains ah a um mi Ye Hein Zaw le Pyou Hein Htut hna cu New York khuapi tazazi zung pakhat ah taza cuaih dingin timhlamhnak an ngeih cuahmah hna lio a si. A tu taza an cuaih mi hna case hi kum (5) tiang Thawngthlak khawh an si tiah theih a si. Credit; The Chin Light, The Chin Journal

Be the first to comment

Leave a Reply

Your email address will not be published.


*