US Ralkap Vanlawng Pakhat Cu March 19 Ah Khan Norway Ram Ah A Tla I Aa Cit Mi Minung 4 An Zate In An Nunnak Liam Tiah Theih A Si.

US ralkap vanlawng pakhat cu March 19 ah khan Norway ram ah a tla i aa cit mi minung 4 an zate in an nunnak liam tiah theih a si. Hi vanlawng hi US Maraine ralkap vanlawng a si i NATO ralkal pawl he raltuk an cawnṭi lio ah a tla tiah theih a si.

Norway ram Bodo khuapi thlanglei khuacaan a chiat ngainak hmun ah a tla i khuacaan a chiat tuk caah bawmchan ding i a kal mi Helicopter an ṭum kho lo i a thaizing ah a tlaknak hmun ahcun Vur lak hmanmi Mawṭaw saikel hmang in an va kal tikah a chung aa citmi minung 4 cu an dihlak in an nunnak liam, hi a nunnak a liam mi hna hi an dihlak in US mi an si tiah Norway police nih an fehter.

Khuacaan a chiattuk caah maw a tlak ti mi le zeiruang ah a tlak ti mi le thil sining zong hlathlainak kan tuah rih lai lo i khuacaan a ṭhat tik ah kan hlathlai te lai, tiah Norway palek nih an thanh.

Ukraine President Zelensky nih cun Russia President Putin he ton biaruahnak ngei ding in timh cia ka si i, nain tonbiaruahnak ah hnatlaknak pakhat tal kan ser khawh lo ahcun vawleicung ralpi pathumnak(WW3) chuahtertu a si kho, tiah a ti.

Thawng dang

Atutan buainak hi tonbiaruahnak ngeih lo ahcun raldohnak hi kan ngol kho lai lo, tiah Ukraine President Zelensky nih cun US thawngzamh CNN he biaruahnak ah a chim. Ukraine nih a ngeih mi uknak le a vawlei a ram a co khawh ṭhan nakhnga caah mizei poh i tel khawhnak remdaih biaruahnak kan ngeih a herh ko, tiah Russia Cozah sin ah nawlnak zong a tuah chih.

NATO member ah Ukraine lut loin le Ukraine cu khoika lei hmanh ṭang loin a um nak ding ah kaphnih hnatlaknak kan tuah kho deng cang i Russia le Ukraine karlak bairuahnak zong pehzulh in kan ngei ṭhan lai, tiah Russia palai pakhat nih naite ah khan a rak chim.

Nizaan, March 20 ah Russia nih Ukraine ram Mariupol khuapi chung ah mizapi 400 hrawng  an i dornak Art sianginn pakhat cu bomb an thlak i a rawk dih cikcek tiah Mariupol council nih a thanh i a nungdam mi kong ah zeihmanh theih a si rih lo. Atu bantuk Russia ralkap nih mizapi umnak an kah hram mi hi an duh ding in ral hmai an nawr khawh lo caah a si,” tiah US Defense Minister Lloyd Austin nih cun a chim.