CNF thantar hi kan Chinram thantar a si awk a si, Chin ramkulh thantar hi hlonh ding a si cang

CNF thantar hi kan Chinram thantar a si awk a si, Chin ramkulh thantar hi hlonh ding a si cang
========================

Tutan paih ah CDF Lai paih ah Champion a hmu mi an taisawm(belt) ka zoh tik ah ka lung a tha lo ngaingai. An taisawm ah Chin ramkulh(state) flag muisam ka hmuh rih. Taisawm ah hin Chin Miphun kan si nak Flag muisam a um ding a si lo maw? Ziah miphun kan si nak flag si lo in ralkap uknak nih a kan pek mi ramkulh flag cu kan hmuh rih e? Tu hnu ah cu Chin Miphun kan si nak (CNF) flag hi hman caan a za cang. Chin state flag hi cu hlonh i mei khangh ding a si cang.

Nay Win nih 1962 kum in ram nawl ngeih nak a lak hnu thawk in Chin National Day si lo in Chin State Day tuah ding ah nawl a rak chuah, cu ca’h cu thawk cun Chin Miphun ni cu Zalong tein kan rak tuah kho ti lo. Caan cu a liam thlauhmah i CNF hruainak thawng in 2012 kum ah Nation Ceasefire Agrrement(NCA) min a thut i cu hnu ah 2013 thawk in Chin National Day cu ram pumpi zalong tein kan tuah kho than a rak si. “Chin National Day hi Chin Miphun pakhat kan sinak a langhter tu kan identity a si i Chin miphun ca’h a baipi tuk mi Ni a si.”

Chin Hill cu 1974 kum ah ralkap uknak kut tang ah ramkulh an pek i Chin State flag zong hi ralkap duh nak in a rak ser mi a si. Cu caah Chin State Flag hi Chin Miphun kan si nak kan Miphun Flag hrim hrim a si lo. Chin Miphun, kan Miphun flag cu Chin National Front (CNF) flag hi a si.

Chin Mino tampi zong nih mah hi kan i fiang lo i Chin State flag hi Kan Miphun Flag ah kan ruah tawn. Chin National Day hna ah Chin State flag hrim hrim kan hman awk a si ti lo. CNF flag tu hi hmang cang hna u sih. Mah Chin ramkulh flag kan hmang ko rih ah cun ralkap thalo uknak kan duh ko tiah a sawh duh mi cu a si ko.

United Kingdom sin in Zalonnak kan ngah hnu 1948 kum ah Chin Hill Special Division hi rak ser a si, cun kan khualipi cu Falam a rak si. Mah lio caan ah cun Mindat, Kanpalet le Matupi peng hna hi Pakokku Hill Tracts chung ah a rak i tel i Paletwa peng zong hi Arakan Hill Tracts chung ah a rak i tel ve. Sihmanhselaw Chin Hill Special Division January 4, 1974 kum ah State(ramkulh) ah pek a si i Mindat, Kanpalet, Matupi le Paletwah hna zawng Chin ramkulh ah tel chih dih a rak si.

1948 kum, February ni 20 ah “General Assembly of Chinland” cu Falam ah an rak tuah i Chin National Day(Chin Miphun Ni) philh lo nak tuah ding ah an rak thim. Chin Miphun Ni hi 1948 in 1962 tiang cu zalawng tein kan rak tuah kho. Nay Win Ralakp Acozah nih ram uknak a lak hnu cun Chin Miphun Ni hi hrawh a rak i timh.

Kum 1994 ah cun ralkap uknak nih Chin Miphun Ni tuah lo ding in nawl a chuah i a rak kham. Chin Miphun Ni si lo in Chin ramkulh Ni (Chin State Day) tuah ding ah a fial hna. Chin Miphun Ni hi Ramkap Acozah hrawh a rak i timh natein kan pu le pa hna Chin Miphun dawt nak a rak ngei ruang ah an rak hrawh kho lo.

Kan Pu Hrang Nawl nih 1965 kum ah ralbawi. Ne Win doh ding ah hriam a rak tlaih i Chin Liberation Amy a rak dirh. Natein Nay Win doh ding ah a rian a rak lim kho lo. A voi 2 nak ah 1988 kum ah Chin Nationl Front(CNF) cu Pu Tial Khal, Pu Lian No Thang and Pu Roenga nih an dirh than ve mi a si.

Tutan cu CNF hruainak thawng in chuak lak in Ralkap uknak hi doh cang u sih. Ralkap uknak a hrampi in lung rual tein kan phongh dih hna lai. Pathian kan hmai ah a kal lai i a rauh hlan ah, Mah miphun ram, holh, Biaknak kan ngei ve cang lai.

By, Salai Johnson C.Thabawi

Be the first to comment

Leave a Reply

Your email address will not be published.