Zualko: Laitlang CDM Palik  Mizoram ah a Nunnak a Liam

SAC ralhrang uknak duh loin palik rian chuahtak in CDM a tuah i Mizoram ah aa dormi Pum Cin Mang (kum 26) cu Mizoram, Sihphir khua ah a nunnak a liam, tiah thawng kan theih. Nihin zinglei sml. 11:00 hrawng ah zunput a kal hnu ah a paw fak ngaiin a um i sizung ah an kalpi. Asinain, a nunnak an khamh manh ti lo.

Pum Cin Mang hi Tedim peng, Suangpi khuami Pu Kam Za Htun i a fapa a si. A nulepa zong Mizoram lei in thawng an thanh cang hna. Chungkhar nih Sihphir khua ah a rauk vuipiak ding in an hal hna bang in nihin zaanlei sml. 3:00 ah a ruak an thlak cang, tiah thawng kan theih.

Nov 8 ah UN Security Council meeting an tuah i Myanmar buainak kong an ceih hnuah “kan lungre a thei ngai ko (အလွန်စိုးရိမ်ပါသည်)” tiah cathanh an chuah thanmi kongah kan lung a rawk taktak tiin Myanmar zatlangbu hna nih Nov 11, tuni ah cathanh an chuah.

UN Security Council cathanh ah cun Myanmar ah ralhrangbu nih an tuahmi hramhram sersatnak ngol ding, ASEAN hnatlaknak zulh ding, ASEAN palai he tonbiaruahnak cohlan ding tiah an langhter.

Ralhrang nih sualnak ngeilo mi tampi an thah cang hna i khua an duahmi le inn an khangmi zong a tlawm ti lo. Mipi nih ralhrangbu hitluk in kan tuar hnu zongah ralhrangbu dantat phihkharnak tuah loin “kan lungre a thei ngai ko” tiah hmasa bantukin cathanh chuah than cu sullam a ngei lo.

Chin ramkulh ah ralhrang nih khua le inn tampi an khangh hnuah tualchung le ramkip huap zatlangbu 521 nih Myanmar buainak kongah lakhruak UN Security Council meeting tuah dingin Nov 4 ah khan halnak an tuah.

Zatlangbu hna halnak ca ah cun ralhrangbu cungah ramkip nih dantat phihkharnak tuah ding le UN zong nih ralhrangbu sinah hriamnam zuarhnak kham dingin an langhter. Mipi a that cuahmahmi ralhrangbu sinah India, Russia le UN SC chungtel ram hna nih ral hriamnam an zurich peng rih. Cu chungah China cu ral hriamnam le tangka chawva lei in ralhrangbu a bawmtu bik a si tiah zaltangbu hna nih an chim.

Progressive Voice in Daw Khin Oh Ma nih “UN SC cawlcanghnak tha a der tuk i kan lungrawk ko. Vawleicung i nawlngeihnak sangbik a ngeimi bu nih “kan lungre a thei” timi biafang hmangin cathanh an chuahmi cu mithat lainawng ralhrangbu sualnak kha an hmu lo i Myanmar mipi hna temtuarnak zei an rel lo bantuk a si.

Hihi UN cawlcanghnak ah sunghnak pakhat a si. Ralhrangbu cungah UN nih dantatnak tuah kho lo dingin a khamtu UN SC chungtel ram hna hi Myanmar rammi hna cungah ralhrangbu nih a chia deuh chinchin mi thatlonak tuah dingin bawmtu an si. Hi hna hna hi ralhrangbu thiltuahmi tha a petu an si” tiah a chim.

CHRO in Salai Za Uk Ling zong nih “Thantlang ah ralhrang nih inn an khangh khan UN SC ah Myanmar buainak kong ceih dingin kan hal. Chin ramkulh ah August thla in ralhrang tampi an phan chap i Khrihfa biakinn le biaknak he aa pehtlaimi inn 22 an khangh. Voi tampi kan hal buin mipi chan chuahnak a tuah kho lomi le hmualngei in rian a tuan kho lomi UN SC cungah zumhnak a tlau cang” tiah a chim ve.Cun Women Peace Network in Ma Wei Wei Nu zong nih “UN SC cawlcanghnak tha a der tukning hi tihnung khi a si. Kum 2017 i Rohinya miphun thahnawnnak hnuin ralhrangbu tuahi sualnak dantat le phihkharnak an tuah bak lo. UN chungtel a simi ram pakhat ah ralhrangbu nih hi tluk in an tuahmi cu UN sunghzatlaknak pakhat a si.

Ralhrangbu nih an tuahmi thatlonak kongah tuanvo an lak nakhnga UN SC nih rian a tuan hrimhrim ding a si tiah lungfak ngai in a chim ve. Ralhrangbu nih Feb 1 i nawlngeihnak an lak hnuin sualnak ngei lo mipi 1252 an thah cang hna i phungning loin an tlaihmi 10000 hrawng an si cang tiah Khet Thit Media nih a tial.

 

 

Be the first to comment

Leave a Reply

Your email address will not be published.


*